کراچی جبری گمشدگیوں کے خلاف دھرنا 29ویں روز میں داخل

کراچی جبری گمشدگیوں کے خلاف دھرنا 29ویں روز میں داخل

کراچی: پریس کلب کے باہر جبری گمشدگیوں کے خلاف احتجاجی کیمپ اپنے 29ویں روز میں داخل ہو گیا ہے۔ شدید گرمی اور مسلسل مشکلات کے باوجود لاپتہ افراد کے اہلخانہ، جن میں خواتین، بزرگ اور بچے شامل ہیں، اپنے پیاروں کی بازیابی کے لیے دھرنا دیے ہوئے ہیں۔

اس موقع پر لاپتہ بلوچ طالب علم زاہد بلوچ کے والد، حمید بلوچ نے میڈیا سے گفتگو کرتے ہوئے کہا کہ چند روز قبل ماڑی پور میں ہم نے صرف اس یقین دہانی پر اپنا دھرنا ختم کیا تھا کہ لاپتہ نوجوانوں کو بازیاب کرایا جائے گا۔ انہوں نے بتایا کہ ماڑی پور تھانے میں اعلیٰ سرکاری حکام سے ملاقات بھی کروائی گئی، لیکن یقین دہانیوں کے باوجود تاحال کوئی نوجوان رہا نہیں کیا گیا۔ ان کا کہنا تھا کہ یہ رویہ ہمارے زخموں پر نمک چھڑکنے کے مترادف ہے۔

حمید بلوچ نے مزید کہا کہ ان کا بیٹا زاہد بلوچ نے حال ہی میں جامعہ کراچی کے شعبہ بین الاقوامی تعلقات سے گریجویشن مکمل کی تھی۔ روزگار کے محدود مواقع کے باوجود وہ رکشہ چلا کر اپنے خاندان کی کفالت میں ہاتھ بٹا رہا تھا۔ لیکن اب اس کی جبری گمشدگی نے پورے خاندان کو تباہی کے دہانے پر پہنچا دیا ہے۔ حمید بلوچ خود جگر کے عارضے میں مبتلا ہیں جبکہ مالی حالات بھی نہایت کمزور ہیں۔

خیال رہے کہ کراچی کے مختلف علاقوں سے متعدد بلوچ نوجوان جبری گمشدگیوں کا شکار ہیں۔ ان میں ماڑی پور اور لال بکھر ہاکس بے کے شیراز بلوچ، سیلان بلوچ، سرفراز بلوچ، رمیز بلوچ، رحیم بخش بلوچ اور رحمان بلوچ شامل ہیں۔ اسی طرح ملیر سے میر بالاچ بلوچ اور صادق مراد بلوچ بھی کئی ماہ سے لاپتہ ہیں۔ ان کے اہلخانہ بھی کراچی پریس کلب کے سامنے جاری دھرنے میں شریک ہیں۔