کوئٹہ: بلوچ یکجہتی کمیٹی ، طلبہ تنظیمیں ، اساتذہ و دیگر سیاسی و سماجی کارکنان کے نام فورتھ شیڈیول میں شامل

گوادر میں بلوچ یکجہتی کمیٹی کے دھرنے کے بعد بلوچستان حکومت نے دہشتگردی ایکٹ کے تحت درجنوں افراد کو فورتھ شیڈول میں شامل کیا ہے، جن میں طلبہ رہنما، سماجی کارکن اور صحافی شامل ہیں۔

حکومت کی طرف جو لسٹ سامنے آئی ہے جس میں سیاسی کارکنوں پر مسلح تنظیم بی ایل اے سے ہونے کا الزام لگایا گیا ہے۔
فہرست میں ، چیئرمین بی ایس بالاچ قادر، مرکزی سیکریٹری جنرل صمند بلوچ، مرکزی سیکریٹری اطلاعات شکور بلوچ اس کے علاوہ بی وائے سی کی رہنما بیو بلوچ کے والد غفار قمبرانی، عبد الستار ولد الله داد، بلخ شیر ولد عبدالغفار، اسٹنٹ پروفیسر گورنمنٹ کالج کوئٹہ عابد میر سمیت دیگر انسانی حقوق کے کارکن، پروفیسرز، اور لیکچررز، صحافی اور سیاسی رہنماؤں و کارکنان سمیت دیگر افراد کا نام شامل ہیں ۔

انسداد دہشتگردی کے قانون 1997 کے مطابق اگر کوئی خفیہ ادارہ صوبائی حکومت کو کسی ایسے شخص کے بارے میں بتائے جس کی کسی کالعدم تنظیم سے بالواسطہ یا بلاواسطہ وابستگی ہو تو اُسے ایک زیر نگرانی فہرست میں شامل کیا جاتا ہے جسے فورتھ شیڈول کہا جاتا ہے ۔

عابد میر کا جن کا نام انسداد دہشت گردی ایکٹ کے تحت فورتھ شیڈول میں شامل کیا گیا ہے۔ انکا کہنا ہے کہ ا یک مسلح تنظیم سے تعلق جوڑنے کا الزام نہ صرف بے بنیاد ہے بلکہ یہ ایک سرکاری ملازم کے کریئر اور ایک پرامن شہری کی زندگی سے کھیلنے کے مترادف ہے، اس الزام کے بعد سے میری فیملی، بیوی بچے، والدین ذہنی طور پر شدید دباؤ کا شکار ہیں۔‘
عابد میر درجنوں کتابوں کے مصنف ہیں جن میں کہانیاں اور تراجم شامل ہیں۔ اس کے علاوہ وہ شش ماہی رسالہ مہر نامہ بھی شائع کرتے ہیں اور اردو مضمون کے لیکچرر ہیں۔

انھوں نے بی بی سی کو بتایا کہ انھوں نے فورتھ شیڈول میں شامل ہونے کا نوٹیفیکشن سوشل میڈیا پر ہی دیکھا ہے، یہ انھیں ذاتی طور پر موصول نہیں ہوا اور نہ کسی سرکاری ادارے نے ان سے اس بارے میں رابطہ کیا ہے۔
بلوچ یکجہتی کمیٹی کی سربراہ ماہرنگ بلوچ نے بی بی سی کو بتایا کہ ’اس (فہرست) میں ہمارے بہت سے کارکنوں اور حمایتیوں کے نام بھی شامل ہیں ۔
بہت سے پروفیسرز کا نام بھی اس میں شامل ہے اور انھیں ہراساں کیا جا رہا ہے کہ آپ بلوچ یکجہتی کمیٹی کی سرگرمیوں میں شامل ہیں اور ان کی حمایت کر رہے ہیں۔‘

نھوں نے کہا کہ ’یہ وہی رویہ ہے جو ریاست کی جانب سے بلوچستان کے لیے کبھی نہیں بدلا ہے۔ اس طریقہ کار سے جو بلوچستان کی عوام اب سیاسی سرگرمیوں میں حصہ لے رہی ہے انھیں ہراساں کیا جا رہا تاکہ وہ ریاست کے لیے کام کریں اور کسی بھی سیاسی سرگرمی کا حصہ نہ بنیں۔‘
دوسری جانب گلزار دوست کا نام بھی فورتھ شیڈول میں شامل کیا گیا ہے۔ وہ تربت میں جبری گمشدگیوں اور دیگر مقامی مسائل کے حوالے سے سرگرم رہنے کے ساتھ ساتھ بلوچ یکہجتی کمیٹی کے اسلام آباد میں دھرنے میں بھی شریک رہے اور اس سے قبل خود بھی تربت سے کوئٹہ تک پیدل مارچ کر چکے ہیں اور حکومت کی جانب سے ان کا تعلق کالعدم تنظیم بلوچ لبریشن فرنٹ سے جوڑا گیا ہے۔

گلزار دوست کا کہنا ہے کہ ’فورتھ شیڈول میں نام ہونے کی وجہ سے وہ جس ضلع میں ہیں اُسی ضلع میں نظر بند رہتے ہیں۔
حکومت بلوچستان کے ترجمان شاہد رند نے بی بی سی کو بتایا کہ ’حکومت اور ضلعی انتظامیہ کے پاس قانونی طور پر یہ اختیار موجود ہے کہ کسی بھی شخص کا نام قانون نافذ کرنے والے اداروں کی رپورٹ پر فورتھ شیڈول میں شامل کیا جا سکتا ہے۔‘

دوسری جانب صوبائی وزارت داخلہ کے ایک سینئر اہلکار نے نام ظاہر نہ کرنے کی شرط پر بتایا کہ گوادر میں راجی مچی یعنی قومی اجتماع کے بعد سے بلوچستان کے مختلف اضلاع سے 300 کے قریب لوگوں کو فورتھ شیڈول میں شامل کیا گیا ہے۔

بلوچستان کے سابق وزیر اعلیٰ ڈاکٹر عبدالمالک بلوچ کا دعویٰ ہے کہ صوبے میں تین ہزار افراد کا نام فورتھ شیڈول میں شامل کیا گیا ہے۔
ڈاکٹر عبدالمالک بلوچ کا بی بی سی سے بات کرتے ہوئے کہنا تھا کہ ’جن لوگوں کے نام فورتھ شیڈول میں شامل کیے گئے ہیں وہ ذمہ دار شہری ہیں۔ ان میں آفیسرز، ٹیچرز اور سیاسی رہنما اور کارکن ہیں۔

انھوں نے بتایا کہ ’بی ایس او پجار کے چیئرمین بوہیر صالح بلوچ اور ایک ٹیچر عابد میر کا بھی نام شامل کیا گیا ہے۔
’حکومت کا یہ عمل انتہائی غلط ہے جس کے نتائج کسی طرح بھی اچھے نہیں ہوں گے‘

چیرمین بلوچ سٹوڈنٹس آرگنائزیشن بالاچ قادر نے بھی اس اقدام کی مذمت کرتے ہوئے بی بی سی کو بتایا کہ ’اس سے لگتا ہے کہ حکومت بلوچستان میں سیاسی عمل کو بند کرنا چاہتی ہے لیکن بلوچستان کے طلبا اور سیاسی کارکن اپنی جدوجہد سے دستبردار نہیں ہوں گے۔‘

’ہم نے آئین اور جمہوریت پر یقین رکھتے ہوئے ہمیشہ انسانی حقوق اور انصاف کے لیے آواز بلند کی ہے جو ہمارا آئینی حق ہے۔ حکومت کی جانب سے سنگین الزامات لگا کر جعلی بیانیے کے تحت ہمیں فورتھ شیڈول میں شامل کرنا ناصرف مضحکہ خیز بات ہے بلکہ اس سے واضح ہوا کہ بلوچستان میں پرامن سیاسی جدوجہد کے دروازے بند کر کے سیاسی کارکنان کو دھکیلا جا رہا ہے۔ اس طرح کے غیرآئینی ہتھکنڈے ہماری پرامن جدوجہد کو دبا نہیں سکتے۔‘