گوادر ریلی:منگل کے روز اسلام آباد لانگ مارچ شرکاء پر تشدد کے خلاف ہزاروں افراد سڑکوں پر نکل آئے

گوادر میں منگل کے روز اسلام آباد لانگ مارچ شرکاء پر تشدد کے خلاف ہزاروں افراد سڑکوں پر نکل آئے جاوید کمپلیکس تا لالا شہید حمید چوک تک سینکڑوں موٹر سائیکلوں پر مشتمل ریلی، مظاہرین نے اسلام آباد پولیس و حکومت کیخلاف اور ماہ رنگ بلوچ کے حق میں شدید نعرے بازی کی یہ ریلی حق دو تحریک کی کال پر نکالی گئی جو کہ جاوید کمپلیکس سے شروع ہوکر استاد عبدالمجید گوادری ایونیو، میرین ڈرائیو سے ہوتے ہوئے گوادر پورٹ روڈ کے وائی چوک کے مقام پر پہنچی ۔

حق دو تحریک کےسربراہ مولانا ہدایت الرحمن اور مرکزی چیئرمین حسین واڈیلہ نے ریلی سے خطاب کیا ۔اپنے خطاب میں مقررین نے کہا کہ ریلی کا مقصد 26 دسمبر 2022ء کو گوادر میں حق دو تحریک کے دھرنے پر کریک ڈاؤن، شہریوں پر تشدد اور اسلام آباد لانگ مارچ کے شرکاء پر بلاجواز تشدد و گرفتاریوں کی مذمت کرنا ہے۔

انہوں نے کہا کہ بلوچستان مفتوحہ ہے اور اسلام آباد بلوچ کیلئے نو گو ایریا ہے۔ بلوچ کو قتل کیا جاتا ہے ان کی لاشیں ماورائے عدالت پھینکی جاتی ہیں اور انہیں رونے بھی نہیں دیا جاتا۔ حق دوتحریک بلوچ اور بلوچستان کی آواز ہے، ماہیگیروں کے حقوق کی آواز ہے۔