27 مارچ 1948 کو نومولود ریاست پاکستان کا بلوچستان پر جبری قبضے اور اس سیاہ دن کی مناسبت سے بلوچ فریڈم فرنٹ کی جانب سے جاری کردہ بیان

بلوچ فریڈم فرنٹ کے مرکزی ترجمان نے بلوچستان کے "یوم سیاہ” کے موقع پر ایک بیان جاری کرتے ہوئے کہا ہے کہ 11 اگست 1947 کو بلوچستان نے انگریزوں کے قبضے سے مکمل آزادی حاصل کی تھی اور بلوچ قوم نے اپنا ایک آزاد وطن بنایا تھا، 27 اگست کو بلوچستان میں بلوچ آزادی کا اعلان کیا گیا تھا۔ مارچ 1948 میں پاکستانی ریاست نے فوجی طاقت سے بلوچستان پر حملہ آور ہوکر بین الاقوامی قوانین کی خلاف ورزی کرتے ہوئے بلوچ قوم کو غلامی کی زنجیروں میں جکھڑ دیا تھا۔ اور بلوچ عوام کو ان کے زندگی اور آزادی کے حق سے محروم کردیا جو یقیناً بلوچ قوم کے لئے یہ ایک سیاہ دن ہے۔

ترجمان نے مزید کہا کہ بلوچ قوم نے پہلے دن سے ہی اس جبری قبضے کو قبول نہیں کیا اور اپنی آزادی اور وطن کے دفاع کے لیے اٹھ کھڑے ہوئے جس کے لیے جدوجہد آج تک جاری ہے۔ اپنی سامراجیت کو برقرار رکھنے کے لیے ریاست شروع سے ہی مختلف ہتھکنڈوں سے بلوچ قومی تحریک کو کمزور اور ختم کرنے کی کوشش کرتی رہی ہے لیکن بلوچ کی اجتماعی کوششوں اور جہد سے یہ قومی تحریک رواں دواں ہے۔

ترجمان نے مزید کہا کہ 27 مارچ کو یوم سیاہ منانے کا مقصد عالمی برادری، میڈیا، انسانی حقوق کے کارکنوں اور اقوام متحدہ کی توجہ ناجائز قبضوں، مظالم اور جبری الحاق کے تاریخی پس منظر کی طرف مبذول کرانا ہے۔ واضح رہے کہ بلوچ قوم نے پاکستان کے جبری الحاق کو کسی بھی صورت میں قبول نہیں کیا۔

بلوچ قوم کی اپنی شناخت، بھرپور تاریخ، وسیع ثقافت اور اپنا وطن ہے۔ اپنی شناخت اور وطن کے دفاع کے لیے ہم نے انگریزوں کے تسلط کو قبول نہیں کیا اور ہمت سے ان کا مقابلہ کیا اور بالآخر آزادی حاصل کی۔ لیکن 27 مارچ 1948 کو بلوچ قوم کو ایک بار پھر نیو ڈیموگرافک یلغار کا سامنا کرنا پڑا لیکن اس نیو ڈیموگرافک یلغار سے شکست کھانے کے بجائے بلوچ قوم نے اسے مسترد کر دیا اور اپنی آزادی کے دفاع کے لیے قومی جدوجہد کی بنیاد رکھی۔ پہلے دن سے جدوجہد مسلسل ارتقائی عمل سے گزری ہے اور آج ایک منظم تحریک کی شکل میں ریاستی تسلط کی بنیادیں ہلا کر رکھ دی ہے۔

آخر میں ترجمان نے کہا تمام ظلم جبر و قومی غلامی سے نجات حاصل کرنے کیلئے ستائیس مارچ کے دن کو یوم سیاہ کے طور پر مناکر ریاست پاکستان کے ظلم و جبر کو دنیا کے سامنے آشکار کرنے کیلئے 27 مارچ کو یوم سیاہ کے حوالے سے تمام زونز میں سوشل میڈیا اور آن گراؤنڈ مہم چلائی جائے گی جس کے لیے انسانی حقوق کے علمبرداروں کو آگے آنا ہو گا کیونکہ بلوچ قوم کے ساتھ ہونے والی منظم نا انصافیوں اور انسانی حقوق کی خلاف ورزیوں کے خاتمے آزادی اور انصاف کے مطالبے کو سننے اور اس پر عالمی سطح پر عملدرامد کے لیے بلوچستان پر دنیا کی توجہ اہمیت رکھتی ہے. دنیا کو بلوچوں کے دکھوں کی طرف توجہ دینی چاہیے اور پاکستان کو انسانیت کے خلاف ایسے گھناؤنے جرائم کے ارتکاب سے روکنے کے لیے سرگرم عمل ہونا چاہیے۔