اتحاد اور قومی منزل کا حصول تحریر: شہیک بلوچ

اتحاد اور قومی منزل کا حصول

تحریر: شہیک بلوچ

جہاں بات نیشن یا نیشنلزم کی ہوتی ہے وہاں اجتماعی سوچ و اجتماعی مقاصد کو بنیادی اہمیت دی جاتی ہے۔ فرد، شخصیت، تنظیم، پارٹی و گروہ ثانوی حیثیت اختیار کرتا ہے۔ کیونکہ فرد سے لے کر لیڈر، لیڈر سے لے کر گروہ، تنظیم و پارٹی کے مقاصد قومی ہوتے ہیں۔ منزل اجتماعی ہوتے ہیں اسی لیے جواہر لعل نہرو ایک حوالہ دیتے ہیں کہ عظمت کا معیار فرد کو خاندان، خاندان کو معاشرے کے لیے قربان کرنا پڑتا ہے۔ اپنی ذاتی خواہشات و تصورات، گروہی مفادات سب کچھ ایک قومی منزل کے لیے قربان کرنا ہی نیشنلزم کا اصل معیار ہے جہاں آپ خود کو جزو سمجھ کر کل سے جوڑنے کی کوشش میں نہ صرف انفرادی طور پر مضبوط ہوتے ہیں بلکہ گروہی طور پر آپسی اتحاد کے ذریعے مزید پائیدار کردار یا فینن کے الفاظ میں تاریخ مجسم کا کردار ادا کرتے ہیں۔ افلاطون انسانی جسم کی ہم آہنگی کو معاشرے پر بیان کرتے ہوئے یہی درس دیتا ہے کہ جہاں انسانی جسم میں دماغ، دل اور appetite کی ہم آہنگی ایک صحت مند انسان کو تشکیل دیتی ہے وہی افلاطون کے مثالی ریاست میں دماغ (فلاسفر کنگ) ، دل (سپاہی) ، Apettite (لیبر) کی ہم آہنگی ایک صحت مند اجتماعی معاشرے کو برقرار رکھتے ہیں۔ ہم آہنگی قائم کرنے والا مختلف رنگ کے دھاگوں کو ایک خوبصورت نقش میں بدل دیتا ہے۔ اب اس بابت دیکھا جائے کیا ہم نے مختلف دھاگوں کو لے کر اجتماعی نقش کو کتنا خوبصورت بنایا ہے یا مزید نفاق کے بدنما لکیریں کھینچی ہیں؟

کیا آج بلوچ جہدکار، ذانتکار، لیڈر، پارٹی و تنظیم اجتماعی سوچ کو لے کر متحد ہونے کی اہمیت کو سمجھتا ہے؟ یا اتحاد ایک شجر ممنوعہ بن چکا ہے؟

اگر ایسا ہے تو ہمیں ضرور سوچنا چاہیے کہ ہم کہیں کسی اور راہ میں بھٹک تو نہیں گئے؟

یہ سلسلہ چلتا ہی رہے گا۔ ہم خوش فہمی کا شکار نہ ہوں کہ ہم دھرتی کے چنے گئے فرزند ہیں، جب تک ہم اس سطح تک نہیں پہنچتے جب ہم اتحاد کو اولین ترجیح عملی طور پر نہیں بناتے تب تک منقسم صورت میں تحریک ختم تو نہیں ہوگی لیکن نقصان زیادہ اٹھاتی رہے گی۔

ہم آہنگی کے لیے راستہ ہموار کرنا پڑتا ہے۔

انا کے بنجر اور پرخار وادیوں کو جب ہم چلتنی گواڑخوں سے سجا کر اگے بڑھے گئیں تونہ صرف آنے والی نسلیں جنکو خدا نا کرے پھر خون سے یہ قیمت چکانی پڑے گی بلکہ دوراندیشی سے ہم شہدا کے روح کو بھی خوشی سے سرشار کرسکیں گئیں،اور اس عمل کے شہسوار بلوچ تاریخ میں انمٹ نقوش چھوڑے گئیں۔انا کی قربانی زیادہ سخت فیصلہ ہوتی ہے لیکن اس کے اثرات اس سے بھی زیادہ دور رس ہوتے ہیں۔ اس کا مقصد کسی قربانی کی حق تلفی نہیں ہر قربانی اپنی جگہ عظیم ہے لیکن اتحاد کے لیے دی جانے والی قربانی سب سے عظیم تر ہوتی ہے۔

ایک اجتماعی منزل جس میں دکھ، درد و تکالیف کا ایک سلسلہ ہے لیکن تاریخ بہت سرد مہر ہوتی ہے وہ تکالیف یا قربانیوں کو دیکھ کر مظلوم کے لیے جیت کا فیصلہ نہیں کرتی بلکہ وہ طاقت کی بنیاد پر فیصلہ کرتی ہے اور طاقت کا اصل سرچشمہ اتحاد ہی ہوتا ہے۔ اتحاد جو محکوم کو تاریخ مجسم بنا کر ایک قوم کی حیثیت سے اپنی منزل پر لاکھڑا کرتی ہے جہاں بقول بابا مری وہ آگ و تلوار کی کسوٹی پر پورا اترتی ہے نہیں تو منقسم تحریکیں طفلی مراحل میں لھڑکھڑاتی چلتی رہتی ہیں۔ کبھی ابھار زیادہ تو کبھی کم ہوتا رہتا ہے لیکن اتحاد ابھار سے آگے بڑھ کر فیصلہ کن کردار کے سانچھے میں تحریک کو ڈھال دیتا ہے۔

اتحاد ایک جذباتی خواہش ہرگز نہیں بلکہ شعور کی وہ انتہا ہے جہاں اجتماعی کل میں انفرادی و گروہی جزو ایک بڑی طاقت بن جاتے ہیں۔ ان کا ہر وار دشمن پر ہوتا ہے اور وہ ایک قوم بن کر سوچتے اور عمل کرتے ہیں۔