بلوچ وائس فار جسٹس کا انسانی حقوق کے عالمی دن بلوچستان میں جبری گمشدگیوں اور انسانی حقوق کی پامالیوں کے خلاف آواز بلند کرنے کا مطالبہ

بلوچ وائس فار جسٹس کی جانب سے جاری کردہ ایک بیان میں کہا گیا ہے کہ آج دنیا بھر میں انسانی حقوق کا عالمی دن منایا جا رہا ہے، اس دن دوران عالمی سطح پر انسانی حقوق کے تحفظ کے لیے مختلف اقدامات کا اعلان کیا جا رہا ہے۔ تاہم اس دن بھی بلوچستان میں ریاستی فورسز اور ایجنسیوں کی جانب سے بلوچ طالب علموں اور شہریوں کو جبری گمشدگیوں کا نشانہ بنایا جا رہا ہے جو ایک انتہائی افسوسناک اور غیر انسانی عمل ہے۔

یہ بات واضح ہے کہ بلوچستان میں انسانی حقوق کی سنگین پامالیوں کا سلسلہ نہ صرف جاری ہے بلکہ اس میں تیزی آتی جا رہی ہے، ریاستی فورسز کی جانب سے جبری گمشدگیاں اور لاپتہ افراد کی بڑھتی ہوئی تعداد عالمی انسانی حقوق کے بنیادی اصولوں کی کھلی خلاف ورزی ہے۔ بین الاقوامی سطح پر انسانی حقوق کے حوالے سے اقوام متحدہ کے تمام اراکین پر یہ ذمہ داری عائد ہوتی ہے کہ وہ شہریوں کے حقوق کی حفاظت کریں اور یہ عمل ہر شہری کے بنیادی حقوق کے احترام کے تحت ہونا چاہیے۔

بیان میں کہا گیا ہے کہ گزشتہ شب کراچی کے حسن اسکوائر سے چار بلوچ طلباء گمشاد بلوچ، دودا الہی، معراج بلوچ اور مزمل بلوچ کو جبری لاپتہ کر لیا گیا۔ اسی طرح، ضلع قلات کے علاقے منگچر سے تین بھائیوں محبوب علی، ارشاد احمد اور مرید احمد کو ان کے گھر سے اُٹھا کر جبری گمشدگی کا نشانہ بنایا گیا، خاندانی ذرائع کے مطابق مرید احمد ایک نفسیاتی مریض ہیں اور گزشتہ ایک ماہ سے کوئٹہ کے ایک اسپتال میں علاج کے لیے داخل تھے وہ تین روز قبل کوئٹہ سے واپس اپنے گھر منگچر آئے تھے، جہاں انہیں بھی سیکورٹی فورسز نے اپنے ساتھ اُٹھا لے گئے۔ یہ واقعہ انتہائی تشویش کا باعث ہے کہ ایک زیر علاج مریض کو بھی جبری گمشدگی کا نشانہ بنایا گیا ہے۔

بیان میں کہا گیا ہے کہ بلوچستان میں انسانی حقوق کی سنگین پامالیاں جاری ہے اور ریاستی جبر نے عوام کی زندگی کو اجیرن بنا دیا ہے۔ بیان میں مزید کہا گیا ہے کہ 13 اکتوبر 2024 کو نوشکی کی رہائشی اسکول ٹیچر فرید احمد بادینی کو بھی جبری طور پر لاپتہ کیا گیا،ل حالانکہ وہ عمر رسیدہ اور شوگر و بلڈ پریشر کے مریض ہیں۔ انہیں جبری گمشدگی کا نشانہ بنا کر ان کے خاندان کو شدید تشویش میں مبتلا کر دیا گیا ہے۔

عالمی انسانی حقوق کے اصولوں کے مطابق ہر فرد کو اپنے حقوق کے تحفظ کی ضمانت دی جانی چاہیے، بشمول آزادی، تحفظ، اور عزت و احترام کا حق یہ عالمی اصول اس بات کو یقینی بنانے کے لیے ضروری ہیں کہ انسانوں کے ساتھ جبر اور تشدد کا ہر غیر انسانی عمل روکا جائے۔ بلوچستان میں ہونے والی جبری گمشدگیوں اور ریاستی جبر کی مذمت کرتے ہوئے بلوچ وائس فار جسٹس عالمی برادری سے اپیل کرتی ہے کہ وہ اس دن کے موقع پر بلوچستان میں انسانی حقوق کی پامالیوں کو اجاگر کرے اور بلوچستان میں جاری ظلم و ستم کے خاتمے کے لیے اپنا کردار ادا کرے۔

بلوچ وائس فار جسٹس کا مطالبہ ہے کہ بلوچستان میں ہونے والی جبری گمشدگیوں کو فوری طور پر روکا جائے اور گمشدہ افراد کو بازیاب کیا جائے تاکہ بلوچستان کے عوام اپنے بنیادی انسانی حقوق سے محروم نہ ہوں۔ ہم عالمی انسانی حقوق کے تنظیموں اور اقوام متحدہ سے درخواست کرتے ہیں کہ وہ بلوچستان میں ہونے والی انسانی حقوق کی پامالیوں کے حوالے سے اپنی مداخلت بڑھائیں اور عالمی سطح پر ان معاملات کی تحقیقات کرائیں۔