بلوچ یکجہتی کمیٹی لواحقین کا احتجاج 44ویں روز میں داخل، حکومتی خاموشی برقرار

بلوچ یکجہتی کمیٹی لواحقین کا احتجاج 44ویں روز میں داخل، حکومتی خاموشی برقرار

اسلام آباد: بلوچ لاپتہ افراد کے اہلخانہ اور بلوچستان میں گرفتار بلوچ یکجہتی کمیٹی کی قیادت کے لواحقین گذشتہ 44 روز سے پاکستانی دارالحکومت اسلام آباد میں احتجاجی دھرنا دیئے بیٹھے ہیں۔

مظاہرین نے حکومت اور ریاستی اداروں سے اپنے جبری طور پر لاپتہ پیاروں کی بازیابی اور انتقامی کاروائیوں کے خاتمے کا مطالبہ کیا ہے، تاہم تاحال کسی حکومتی نمائندے نے ان سے مذاکرات یا رابطہ نہیں کیا۔

احتجاجی کیمپ میں شریک لواحقین کا کہنا ہے کہ وہ ابتدا ہی سے ریاست کے سامنے دو بنیادی مطالبات رکھتے آئے ہیں جن میں بلوچستان میں جبری گمشدگیوں کا خاتمہ اور لاپتہ افراد کی بحفاظت بازیابی سمیت بلوچ یکجہتی کمیٹی کی قیادت کے خلاف جاری انتقامی کاروائیوں کو روکنا اور گرفتار رہنماؤں کی رہائی شامل ہے۔

مظاہرین نے شکوہ کیا کہ طویل احتجاجی کیمپ کے باوجود حکام کی جانب سے مسلسل خاموشی برتی جا رہی ہے، جس سے لواحقین کی بے چینی اور مایوسی میں اضافہ ہوا ہے۔

دھرنے میں شریک لواحقین نے یہ بھی بتایا کہ احتجاج کے دوران انہیں پولیس ہراسانی کا سامنا کرنا پڑا، جس کی وجہ سے ان کے تحفظ اور بنیادی شہری حقوق کے حوالے سے مزید خدشات جنم لے رہے ہیں۔