بلوچ یکجہتی کمیٹی کا احتجاج سے قبل ہی پولیس کا طاقت کا استعمال، پرامن مظاہرین پر تشدد اور گرفتاریاں

بلوچ یکجہتی کمیٹی کا احتجاج سے قبل ہی پولیس کا طاقت کا استعمال، پرامن مظاہرین پر تشدد اور گرفتاریاں

کوئٹہ میں بلوچستان یونیورسٹی کے مرکزی دروازے کے سامنے آج ایک انتہائی تشویشناک صورتحال پیدا ہو گئی ہے۔ بلوچ یکجہتی کمیٹی(بی وئی سی) کی جانب سے طے شدہ پرامن احتجاج سے قبل ہی، پولیس نے طاقت کا بے دریغ استعمال شروع کر دیا۔ اطلاعات کے مطابق، کمیٹی کے ارکان اور دیگر پرامن مظاہرین ابھی احتجاج کے لیے جمع ہو ہی رہے تھے کہ پولیس نے ان پر دھاوا بول دیا۔

بلوچستان یونیورسٹی کے گیٹ کے باہر پولیس اہلکاروں کی بھاری نفری پہلے سے ہی موجود تھی، اور جیسے ہی مظاہرین جمع ہونا شروع ہوئے، پولیس نے انہیں منتشر کرنے اور گرفتار کرنے کا سلسلہ شروع کر دیا۔ مظاہرین نے ابھی تک کوئی احتجاج شروع بھی نہیں کیا تھا، لیکن پولیس نے انہیں ڈرانے دھمکانے اور طاقت کے زور پر منتشر کرنے کی کوشش کی۔

پولیس کی جانب سے بلا جواز گرفتاریوں کا سلسلہ جاری ہے، جس میں متعدد بلوچ طلباء اور خواتین کو حراست میں لیا گیا ہے۔ خاص طور پر ان لوگوں کو نشانہ بنایا جا رہا ہے جو بلوچی شالیں پہنے ہوئے ہیں۔ یہ واضح طور پر نسلی بنیادوں پر ہراساں کرنے کی کارروائی ہے۔

مظاہرین کا کہنا ہے کہ وہ پرامن طریقے سے اپنا احتجاج ریکارڈ کروانا چاہتے تھے، لیکن پولیس نے انہیں ایسا کرنے سے روک رہا ہے۔ پولیس کی جانب سے طاقت کا یہ بے جا استعمال نہ صرف غیر قانونی ہے بلکہ انسانی حقوق کی بھی سنگین خلاف ورزی ہے۔ پرامن احتجاج ہر شہری کا بنیادی حق ہے، اور پولیس کا فرض ہے کہ وہ اس حق کا تحفظ کرے۔

ہم تمام انسانی حقوق کی تنظیموں اور سول سوسائٹی سے اپیل کرتے ہیں کہ وہ اس معاملے پر اپنی آواز بلند کریں اور مظلوم بلوچ عوام کے ساتھ کھڑے ہوں۔