بلوچ یکجہتی کمیٹی کی قیادت کے خلاف ریاستی جبر کی شدید مذمت، سندھی قوم بلوچ قوم کے ساتھ کھڑی ہے: سھیل ابڑو

بلوچ یکجہتی کمیٹی کی قیادت کے خلاف ریاستی جبر کی شدید مذمت، سندھی قوم بلوچ قوم کے ساتھ کھڑی ہے: سھیل ابڑو

جیئے سندھ فریڈم موومنٹ (JSFM) کے چیئرمین سھیل ابڑو نے بیان جاری کرتے ہوئے کہا ہے کہ بلوچ یکجہتی کمیٹی (BYC) کی قیادت، بالخصوص ڈاکٹر ماہ رنگ بلوچ، بیبو بلوچ، گل زادی بلوچ، صبغت اللہ شاہ بلوچ اور دیگر زیرِ حراست بلوچ رہنماؤں کے خلاف جاری ریاستی جبر، سیاسی انتقام، غیر قانونی گرفتاریوں اور انسانی حقوق کی سنگین خلاف ورزیوں کی شدید مذمت کرتی ہے۔

بیان میں کہا ہے کہ ہم سمجھتے ہیں کہ بلوچ قوم کے سیاسی کارکنوں، انسانی حقوق کے مدافعین اور قومی تحریک کے رہنماؤں کو خاموش کرانے کے لیے ریاستی ادارے طاقت، دھونس اور جبر کے مختلف ہتھکنڈے استعمال کر رہے ہیں۔ ڈاکٹر ماہ رنگ بلوچ اور بلوچ یکجہتی کمیٹی کی قیادت کے خلاف جاری کارروائیاں بنیادی انسانی حقوق، آزادیِ اظہار، آزادیِ اجتماع اور سیاسی سرگرمیوں کے عالمی طور پر تسلیم شدہ اصولوں کے منافی ہیں۔

بیان میں مزید کہا کہ جیئے سندھ فریڈم موومنٹ کا مؤقف ہے کہ پاکستان میں مظلوم اقوام کے سیاسی کارکنوں اور قومی تحریکوں کے رہنماؤں کو انصاف کی فراہمی ایک سنگین مسئلہ بن چکی ہے۔ ریاستی اداروں، بالخصوص فوج اور خفیہ اداروں کی سیاسی معاملات میں مداخلت نے عدالتی اور قانونی نظام کی آزادی اور غیر جانبداری پر سنگین سوالات کھڑے کر دیے ہیں۔ ایسی صورتحال میں بلوچ سیاسی قیدیوں اور قومی تحریک کے رہنماؤں کے لیے انصاف کے امکانات محدود دکھائی دیتے ہیں۔

چیئرمین نے مزید بتایا کہ سندھی قوم بلوچ قوم کے ساتھ اپنی مکمل قومی، سیاسی اور انسانی یکجہتی کا اظہار کرتی ہے۔ سندھ اور بلوچستان کی مظلوم اقوام کئی دہائیوں سے ریاستی جبر، جبری گمشدگیوں، ماورائے عدالت قتل، سیاسی انتقام اور انسانی حقوق کی پامالیوں کا سامنا کر رہی ہیں۔ بلوچ عوام کے خلاف ہونے والی زیادتیوں کو سندھی قوم اپنی تکلیف اور جدوجہد کا حصہ سمجھتی ہے۔

بیان میں انہوں نے کہا کہ جیئے سندھ فریڈم موومنٹ اقوامِ متحدہ، انسانی حقوق کی عالمی تنظیموں، بالخصوص Human Rights Watch، Amnesty International اور دیگر بین الاقوامی انسانی حقوق کے اداروں سے پرزور اپیل کرتی ہے کہ وہ بلوچ یکجہتی کمیٹی کی قیادت اور بلوچ قوم کے خلاف جاری ریاستی جبر، غیر قانونی حراستوں، جبری گمشدگیوں اور انسانی حقوق کی خلاف ورزیوں کا فوری نوٹس لیں۔

چیئرمین نے کہا کہ ہم مطالبہ کرتے ہیں کہ بین الاقوامی ادارے پاکستان میں انسانی حقوق کی صورتحال کی آزادانہ تحقیقات کروائیں اور بین الاقوامی انسانی حقوق کے اصولوں، معاہدات اور قوانین کی خلاف ورزیوں کے حوالے سے پاکستان کو جوابدہ بنانے کے لیے مؤثر اقدامات اٹھائیں تاکہ مظلوم اقوام کو انصاف، تحفظ اور بنیادی انسانی حقوق کی ضمانت فراہم کی جا سکے۔

بیان کے آخر میں انہوں نے کہا کہ جیئے سندھ فریڈم موومنٹ ایک بار پھر بلوچ قوم، ڈاکٹر ماہ رنگ بلوچ، بلوچ یکجہتی کمیٹی اور تمام سیاسی قیدیوں کے ساتھ اپنی غیر متزلزل یکجہتی کا اعادہ کرتی ہے اور اس عزم کا اظہار کرتی ہے کہ سندھ اور بلوچستان کی مظلوم اقوام کے قومی، انسانی اور جمہوری حقوق کے لیے آواز بلند کرتی رہے گی۔