بلوچستان میں جبری گمشدگیوں کے واقعات میں نمایاں اضافہ ہوا ہے ۔اقوام متحدہ کمیٹی برائے انسانی حقوق

قوام متحدہ کی انسانی حقوق کمیٹی (CCPR) کا 142 واں اجلاس آج سوئٹزرلینڈ کے شہر جنیوا میں جاری رہا جہاں اقوام متحدہ کی کمیٹی برائے تحفظ شہری و سیاسی حقوق نے پاکستان میں شہری اور سیاسی حقوق کی صورتحال کا جائزہ لینے کے دوران بلوچستان میں جبری گمشدگیوں کے معاملے کو اجاگر کیا۔
شہری اور سیاسی حقوق کے بین الاقوامی معاہدے کے تحت قائم کی گئی کمیٹی نے پاکستان کے انسانی حقوق کے ریکارڈ کا جائزہ لیا اور پاکستانی وفد سے سوالات کیئے۔
پاکستان میں جاری انسانی حقوق کی خلاف ورزیوں کا جائزہ لینے والے اس سیشن کے دوران فرانسیسی ماہر قانون اور کمیٹی کی رکن ہیلین ٹِگروڈجا نے بلوچستان میں جبری گمشدگیوں پر اپنی رپورٹ پیش کی اور پاکستانی قیادت کے سامنے سوالات اٹھائے۔
گروڈجا نے پاکستان میں انسانی حقوق کی وسیع پیمانے پر خلاف ورزیوں پر تشویش کا اظہار کیا، خاص طور پر بلوچستان میں جبری گمشدگیوں کے بڑھتے ہوئے واقعات کو اجاگر کیا ۔کمیٹی کے رکن کے مطابق بلوچستان میں جبری گمشدگیوں کے واقعات میں نمایاں اضافہ ہوا ہے اقوام متحدہ کے ورکنگ گروپ اور دیگر تنظیموں کے اعداد و شمار کا حوالہ دیتے ہوئے، ٹگروڈجا نے بتایا کہ پاکستان میں 2004 سے 2024 تک جبری گمشدگیوں کے 7000 سے زیادہ واقعات رپورٹ ہوئے ہیں ۔
انہوں نے بلوچستان میں پرامن مظاہرین اور کارکن جو جبری گمشدگیوں اور ماورائے عدالت قتل کی ریاستی پالیسیوں کی مخالفت کرتے ہیں انکے خلاف ریاست کے تشدد اور ریاستی طاقت کے استعمال پر تشویش کا اظہار کیا ۔
س اجلاس کے دوران کمیٹی رکن نے پاکستانی حکام سے قانونی اصلاحات اور احتساب کا مطالبہ کیا۔
اس دوران ٹِگروڈجا نے پاکستان پر زور دیا کہ وہ جبری گمشدگی کے مقدمات کی جامع، آزادانہ تحقیقات کو یقینی بنائے اور متاثرین اور ان کے خاندانوں کو انصاف اور معاوضہ فراہم کرے ۔
جبری گمشدگیوں کے حوالے ہیلین ڈگروجا کے سوالات کے جواب میں پاکستانی وفد نے اعداد و شمار پیش کیے، جس میں دعویٰ کیا گیا کہ جبری گمشدگیوں کے 10,354 کیسز میں سے 8,077 کو حل کرلیا گیا ہے ۔
کمیٹی کے ارکان پاکستانی وفد کے جوابات سے مطمئن نظر نہیں آئے، وقت کی کمی کے باعث پاکستانی وفد کل جنیوا میں اقوام متحدہ کی کمیٹی کے مزید سوالات کے جوابات دے گا۔