بلوچستان: نوشکی، مستونگ، قلات، سوراب اور خضدار میں کرفیو نافذ

بلوچستان: نوشکی، مستونگ، قلات، سوراب اور خضدار میں کرفیو نافذ

بلوچستان کے مختلف علاقوں میں سیکیورٹی خدشات کے پیشِ نظر کرفیو کا دائرہ مزید وسیع کر دیا گیا ہے۔ نوشکی، مستونگ اور قلات کے بعد اب سوراب اور خضدار میں بھی پابندیاں نافذ کر دی گئی ہیں۔

ضلعی انتظامیہ سوراب نے 6 اگست 2026 کی شام 6 بجے سے 8 اگست کی صبح 6 بجے تک کرفیو نافذ کرتے ہوئے تمام دکانیں، مارکیٹیں اور دیگر کاروباری مراکز بند کرا دیے ہیں۔ شہریوں کو ہدایت کی گئی ہے کہ مقررہ اوقات میں غیر ضروری طور پر گھروں سے باہر نہ نکلیں اور سیکیورٹی ہدایات پر سختی سے عمل کریں۔

انتظامیہ کے مطابق کرفیو کی خلاف ورزی کرنے والوں کے خلاف قانونی کارروائی کی جائے گی، جبکہ اعلامیے میں خبردار کیا گیا ہے کہ خلاف ورزی کی صورت میں کسی بھی ممکنہ نقصان کی ذمہ داری متعلقہ افراد پر ہوگی۔

دوسری جانب خضدار میں ضلعی حکام نے تاجروں کو شام کے وقت دکانیں بند کرنے اور عوام کو گھروں سے باہر نہ نکلنے کی ہدایت جاری کی ہے۔

واضح رہے کہ اس سے قبل قلات، مستونگ کے علاقے کھڈکوچہ، زہری اور نوشکی میں بھی سیکیورٹی وجوہات کی بنیاد پر کرفیو یا سخت نقل و حرکت کی پابندیاں نافذ کی جا چکی ہیں۔