بلوچستان کی اہم خبریں: پسنی میں پولیس اہلکار مبینہ اغوا، کچلاک میں ٹرین حادثہ، دکی میں کانکن جاں بحق

پسنی: کوسٹل ہائی وے پولیس اہلکار مبینہ طور پر اغوا

پسنی کے قریب مکران کوسٹل ہائی وے پر ڈوسی کے مقام سے کوسٹل ہائی وے پولیس کے اہلکار فیصل ستار کو نامعلوم مسلح افراد نے مبینہ طور پر اغوا کر لیا۔

ذرائع کے مطابق واقعہ گزشتہ شام پیش آیا، جہاں دو کرولا گاڑیوں میں سوار مسلح افراد نے اہلکار سے موبائل فون لینے اور چیکنگ کے بعد اسے اپنے ساتھ لے گئے۔ فیصل ستار کا تعلق پسنی سے بتایا جاتا ہے۔

واقعے کی مزید تفصیلات تاحال سامنے نہیں آسکیں۔

کچلاک: جناح پیپلز ٹرین کا انجن پٹڑی سے اتر گیا

کچلاک ریلوے اسٹیشن پر کچلاک سے سریاب جانے والی جناح پیپلز ٹرین کا انجن پٹڑی سے اتر گیا۔

عوامی حلقوں نے حادثے کی وجہ پٹڑی کی بوسیدہ حالت قرار دی، جبکہ ریلوے حکام کے مطابق پٹڑی کے نٹ بولٹ چوری ہونے کے باعث حادثہ پیش آیا۔ واقعے کی اصل وجہ انکوائری کے بعد سامنے آئے گی۔

کوہلو: ناران سے نامعلوم شخص کی لاش برآمد

کوہلو کے علاقے ناران سے نامعلوم شخص کی لاش برآمد ہوئی ہے۔

پولیس کے مطابق لاش کو ڈی ایچ کیو ہسپتال منتقل کر دیا گیا، جبکہ شناخت اور واقعے کی مزید تحقیقات جاری ہیں۔

سوراب: چوری و ڈکیتی کے خلاف دکانداروں کا احتجاج

سوراب میں چوری اور ڈکیتی کی وارداتوں کے خلاف دکانداروں نے احتجاج کرتے ہوئے کوئٹہ کراچی آر سی ڈی روڈ کو دو گھنٹے تک بند رکھا۔

ذرائع کے مطابق انتظامیہ اور مظاہرین کے درمیان مذاکرات کے دو دور ناکام ہوگئے۔

تمپ: کلاہو اور جالبار میں فورسز کا آپریشن جاری

تمپ کے علاقوں کلاہو کے جنگل اور جالبار میں پاکستانی فورسز کا آپریشن گزشتہ شب سے جاری ہے۔

ذرائع کے مطابق تاحال کسی گرفتاری کی اطلاع سامنے نہیں آئی، جبکہ فورسز کی بڑی تعداد علاقے میں موجود ہے۔

بلوچستان: سوراب، خضدار اور وڈھ میں دفعہ 144 نافذ

بلوچستان کے اضلاع سوراب، خضدار اور وڈھ میں این-25 شاہراہ پر دفعہ 144 نافذ کر دی گئی ہے۔

دکی: زہریلی گیس سے ایک کانکن جاں بحق، تین بے ہوش

دکی کی مقامی کوئلہ کان میں زہریلی گیس کے باعث دم گھٹنے سے ایک کانکن جاں بحق جبکہ تین بے ہوش ہوگئے۔

ہسپتال ذرائع کے مطابق جاں بحق کانکن کی شناخت نصرت اللہ ولد محمد نبی، قوم شملزئی، ساکن افغانستان کے نام سے ہوئی ہے۔

بے ہوش کانکنوں میں گلاب شاہ، محمد طاہر اور نعمان خان شامل ہیں، جنہیں سول ہسپتال دکی منتقل کیا گیا، جہاں ان کی حالت خطرے سے باہر بتائی جاتی ہے۔