خضدار، تمپ، پنجگور اور تربت میں کارروائیاں خواتین و بچوں پر تشدد، جبری گمشدگیاں، فائرنگ اور مختلف واقعات میں متعدد افراد جانبحق-

خضدار، تمپ، پنجگور اور تربت میں کارروائیاں خواتین و بچوں پر تشدد، جبری گمشدگیاں، فائرنگ اور مختلف واقعات میں متعدد افراد جانبحق-

بلوچستان کے مختلف علاقوں میں پاکستانی فورسز کی کارروائیوں، جبری گمشدگیوں اور پرتشدد واقعات کی اطلاعات سامنے آئی ہیں۔

خضدار کے علاقے اورناچ میں پاکستانی فورسز نے نامعلوم مسلح افراد، جنہیں مقامی سطح پر “ڈیتھ اسکواڈ” کہا جا رہا ہے، کے ہمراہ چھاپہ مار کارروائی کی۔ عینی شاہدین کے مطابق کارروائی کے دوران گھروں میں موجود خواتین اور بچوں نے گرفتاری کی کوششوں پر مزاحمت کی، جس کے بعد فورسز نے خواتین اور کم عمر بچوں کو شدید تشدد کا نشانہ بنایا۔ تشدد کے نتیجے میں متعدد خواتین زخمی ہوئیں جبکہ بچوں میں شدید خوف و ہراس پھیل گیا۔

ذرائع کے مطابق اس کارروائی کے دوران یاسین ولد بہرام اور یوسف ولد محمد کریم کو حراست میں لے کر نامعلوم مقام پر منتقل کر دیا گیا، جن کا تاحال کوئی سراغ نہیں مل سکا۔

ادھر تمپ کے علاقے بالیچاہ، تلکُان میں پاکستانی فورسز نے ایک اور کارروائی کرتے ہوئے عمر رسیدہ بزرگ امیر کو ان کے گھر سے حراست میں لے کر نامعلوم مقام پر منتقل کر دیا۔ مقامی ذرائع کے مطابق اس بزرگ کے بیٹے کو اس سے قبل فورسز قتل کر چکی ہیں۔

پنجگور کے علاقے وشبود میں قائم ایک سروس اسٹیشن پر کام کرنے والے جاسم نامی شخص کو نامعلوم گاڑی سوار مسلح افراد نے اسلحے کے زور پر اغوا کر لیا۔ پولیس نے تاحال اغوا کاروں اور واقعے کے محرکات سے متعلق کوئی تفصیلات جاری نہیں کیں۔

اسی دوران تربت کے علاقے بی اینڈ آر کالونی سے ایک نامعلوم شخص کی لاش برآمد ہوئی جسے شناخت اور قانونی کارروائی کے لیے ہسپتال منتقل کر دیا گیا۔

پنجگور کے تسپ کے پہاڑی علاقے میں پاکستانی فورسز کی اپریشن کے نتیجے میں تین افراد کی جانبحق ہونے کی اطلاعات ہیں، جن کی لاشیں ڈسٹرکٹ ٹیچنگ ہسپتال منتقل کی جا رہی ہیں۔

مزید برآں حب وندر کی ساحلی بستی ڈام بندر میں سمندر کنارے ایک نامعلوم شخص کی لاش برآمد ہوئی ہے۔

جبکہ پنجگور سی پیک روڈ پر زامیاد گاڑی کی ٹکر سے موٹر سائیکل سوار صاحبداد ولد حبیب اللہ ساکن جہلگ جاں بحق ہو گیا۔

واضح رہے کہ بلوچستان میں گزشتہ دو دہائیوں سے جبری گمشدگیوں، ماورائے عدالت حراست، اور کارروائیوں کے دوران شہری ہلاکتوں کے الزامات سامنے آتے رہے ہیں۔ مقامی اور بین الاقوامی انسانی حقوق تنظیمیں بارہا پاکستان سے مطالبہ کرتی رہی ہیں کہ وہ شہریوں کے بنیادی انسانی حقوق کے تحفظ کو یقینی بنائے۔