"شھید اکبر بگٹی قربانی کی علامت، مزاحمت کی پہچان”

نواب اکبر خان بگٹی کا یومِ شہادت — بلوچ قومی تاریخ کا سیاہ دن

26 اگست وہ دن ہے جو بلوچستان کی تاریخ میں ہمیشہ ایک سیاہ باب کے طور پر یاد رکھا جائے گا۔ یہ وہ دن ہے جب طاقت کے نشے میں مست ایک سرکش فوج نے 80 سالہ بلوچ قومی بزرگ رہنما، نواب اکبر خان بگٹی کو شہید کیا۔ ان کی شہادت نہ صرف ایک فرد کا نقصان تھی بلکہ بلوچستان کو ایک نہ ختم ہونے والے طوفان اور آگ میں دھکیلنے کے مترادف تھی۔

نواب اکبر خان بگٹی اپنی بہادری، بصیرت اور سیاسی دانش کے باعث بلوچ عوام کے دلوں میں ایک خاص مقام رکھتے تھے۔ وہ بلوچستان کے حقوق اور قوم کی بقا کی علامت تھے۔ ان کی شہادت نے بلوچ سماج کو جھنجھوڑ کر رکھ دیا اور مزاحمت کی ایک ایسی آگ بھڑکائی جو آج بھی جل رہی ہے۔

وقت نے ثابت کردیا کہ طاقت کے زعم میں آنے والے جرنیل تاریخ کی گرد میں دب گئے، ان کا نام لیوا تک باقی نہ رہا۔ لیکن شہید نواب اکبر خان بگٹی کی یاد اور ان کی قربانی آج بھی بلوچ عوام کے دلوں کی دھڑکن ہے۔ ان کا نام عزت و وقار کے ساتھ لیا جاتا ہے اور ان کا مشن آنے والی نسلوں کے لیے ایک روشن مشعلِ راہ ہے۔

26 اگست صرف ایک دن نہیں بلکہ ایک عہد کی یاد دہانی ہے — وہ عہد جو نواب اکبر خان بگٹی نے اپنی جان قربان کر کے بلوچستان کے نام لکھا۔