شہید ایڈووکیٹ زبیر بلوچ اور ساتھی کو خراجِ عقیدت- نیشنل ڈیموکریٹک پارٹی

شہید ایڈووکیٹ زبیر بلوچ اور ساتھی کو خراجِ عقیدت- نیشنل ڈیموکریٹک پارٹی

نیشنل ڈیموکریٹک پارٹی ایڈووکیٹ زبیر بلوچ اور ان کے ساتھی نثار بلوچ کی شہادت پر گہرے رنج و غم کا اظہار کرتی ہے۔ یہ المناک سانحہ بلوچستان کی سیاست، سماج اور عوامی جدوجہد کے لیے ایک نہایت افسوسناک اور ناقابلِ تلافی نقصان ہے۔

ایڈووکیٹ زبیر بلوچ ان جرات مند سیاسی کارکنوں میں شامل تھے جنہوں نے ہمیشہ قومی مسائل پر دوٹوک اور بے لاگ مؤقف اختیار کیا۔ وہ بلوچ قومی تحریک کے حوالے سے غیر مبہم، باشعور اور مزاحمتی سیاسی سوچ رکھتے تھے۔ تنظیمی سطح پر ان کی قیادت اور جدوجہد نے بلوچ سیاست میں ایک نمایاں اور جراتمندانہ کردار ادا کیا۔

زبیر بلوچ نے بلوچستان میں جبری گمشدگیوں، انسانی حقوق کی پامالی، وسائل کی لوٹ مار اور عوامی محرومیوں کے خلاف ہر پلیٹ فارم پر جمہوری انداز میں آواز بلند کی۔ ایک وکیل کی حیثیت سے انہوں نے عدالتوں اور بار کے پلیٹ فارم سے بھی مظلوموں کے حقوق کی جدوجہد کو سیاسی شعور کے ساتھ جوڑ کر نمایاں خدمات سرانجام دیں۔ ان کی شہادت سے بلوچستان ایک جراتمند اور بصیرت رکھنے والی آواز سے محروم ہوگیا ہے۔

نیشنل ڈیموکریٹک پارٹی عالمی انسانی حقوق کی تنظیموں سے اپیل کرتی ہے کہ وہ بلوچ سیاسی کارکنان اور انسانی حقوق کے علمبرداروں کے تحفظ کے لیے اپنا مؤثر کردار ادا کریں اور بلوچستان میں سیاسی سرگرمیوں پر عائد رکاوٹوں کو ختم کرنے کے لیے عملی اقدامات اٹھائیں۔