ظریف بلوچ کے قتل پر بلوچ وائس فار جسٹس کا اظہارِ مذمت، ریاستی مظالم کے خلاف عالمی مداخلت کا مطالبہ۔

بلوچ وائس فار جسٹس نے ظریف بلوچ کے اغواء، ان پر ہونے والے بے رحمانہ تشدد اور ان کے بہیمانہ قتل کی سخت الفاظ میں مذمت کرتے ہوئے جارہی کردہ پریس ریلیز بیان میں کہا کہ بلوچستان میں اس طرح کے واقعات روز کا معمول بن چکے ہیں جہاں فورسز اور خفیہ ادارے گھروں پر چھاپے مار کر خواتین اور بچوں کو ہراساں اور تشدد کا نشانہ بناتے ہیں جبکہ نوجوانوں کو جبری طور پر اغوا کرکے لاپتہ کیا جاتا ہے۔

بیان میں کہا گیا کہ گزشتہ رات تمپ دازن کے رہائشی ظریف بلوچ کو سیکیورٹی فورسز نے ان کے گھر سے اغوا کیا انہیں شدید جسمانی تشدد کا نشانہ بنایا اور پھر بے دردی سے قتل کر کے ان کی لاش ویرانے میں پھینک دی، یہ افسوسناک ہے کہ اب ان کے خاندان کو ان کی لاش تربت لے جانے کی اجازت بھی نہیں دی جا رہی اور انہیں گزشتہ شام سے ایف سی چیک پوسٹ پر روکا ہوا ہے جو ریاستی اداروں کی انسانیت سوز پالیسیوں کا منہ بولتا ثبوت ہے۔

بیان میں مزید کہا گیا کہ یہ واقعہ نہ صرف انسانی حقوق کی سنگین خلاف ورزی ہے بلکہ ریاستی اداروں کے غیر انسانی طرز عمل کی واضح مثال ہے۔ ظریف بلوچ کے قتل کے بعد ان کے خاندان کا احتجاج کرنا ان کا جائز اور قانونی حق ہے، لیکن ریاست نے پہلے ان کی زندگی چھینی اور اب ان کے لواحقین کو انصاف کے لیے آواز بلند کرنے سے بھی روکا جا رہا ہے۔ یہ عمل انسانی وقار اور بنیادی حقوق کی مکمل پامالی کے مترادف ہے اور عالمی برادری کو اس معاملے کا نوٹس لینا چاہیے۔

بلوچ وائس فار جسٹس نے اپنے بیان میں بلوچ قوم اور انسانی حقوق کی تنظیموں سے اپیل کی کہ وہ اس بے رحمانہ واقعے کے خلاف آواز اٹھائیں اور متاثرہ خاندان کو انصاف دلانے کے لیے اپنا کردار ادا کریں۔ مزید کہا گیا کہ بلوچستان میں انسانی حقوق کی پامالیوں کو روکنے کے لیے عالمی برادری کو فوری مداخلت کرنی چاہیے۔

ظریف بلوچ کے بہیمانہ قتل کے خلاف بلوچ وائس فار جسٹس اور بلوچ ایکٹوسٹ الائنس میڈیا نے آج رات 8 بجے سے 12 بجے تک سوشل میڈیا پر مشترکہ احتجاجی مہم چلانے کا اعلان کیا ہے۔ تمام عوام سے اپیل کی گئی ہے کہ وہ اس مہم میں حصہ لے کر ظریف بلوچ کے لیے انصاف کا مطالبہ کریں اور بلوچستان میں جاری ریاستی جبر کے خلاف اپنی آواز بلند کریں۔