ماہ جبین اور یونس بلوچ کی جبری گمشدگی اور عدالت میں پیش نہ کرنا انسانی حقوق کی خلاف ورزی ہے – نصراللہ بلوچ

وی بی ایم پی کے چیئرمین نصراللہ بلوچ نے اپنے بیان میں بلوچ طالبہ ماہ جبین کی جبری گمشدگی پر گہری تشویش کا اظہار کیا ہے۔ انہوں نے کہا کہ یہ واقعہ دو ہفتے سے زیادہ عرصہ گزر جانے کے باوجود، اب تک انہیں منظر عام پر نہیں لایا گیا ہے اور نہ ہی ان کے خاندان کو ان کی گرفتاری کے حوالے سے کوئی معلومات فراہم کی گئی ہیں۔ یہ صورت حال ملکی قوانین اور انسانی حقوق کے خلاف ایک سنگین خلاف ورزی ہے جس کی وہ سخت مذمت کرتے ہیں۔

نصراللہ بلوچ نے حکومت سے مطالبہ کیا کہ اگر بلوچ طالبہ پر کوئی الزام ہے تو اسے عدالت میں پیش کیا جائے تاکہ وہ اپنے دفاع کا حق حاصل کر سکیں۔ انہوں نے کہا کہ اگر وہ کسی غیر قانونی کارروائی میں ملوث پائی جاتی ہیں تو پھر قانون کے مطابق کارروائی کی جائے گی، ہمیں اس میں کوئی اعتراض نہیں ہے۔ لیکن جبری گمشدگی کا عمل انسانی حقوق اور ملکی قوانین کے منافی ہے اور اس سے انسانی حقوق کی سنگین خلاف ورزی ہوتی ہے۔

انہوں نے مزید کہا کہ بلوچ طالبہ اور ان کے بھائی یونس بلوچ کو جبری لاپتہ رکھنا قابل قبول نہیں ہے۔ وائس فار بلوچ مسنگ پرسنز اس ظلم کے خلاف بھرپور احتجاج کا حق رکھتا ہے اور یہ حق آئین و قانون کے تحت ہے۔ جب تک انہیں منظر عام پر نہیں لایا جاتا اور رہا نہیں کیا جاتا، یہ سلسلہ جاری رہے گا اور ہم اپنی آواز بلند کرتے رہیں گے۔

نصراللہ بلوچ نے تمام مکاتب فکر سے اپیل کی کہ وہ بھی اس سلسلے میں آواز بلند کریں۔ انہوں نے کہا کہ ہر فرد کو چاہیے کہ وہ سوشل میڈیا پر روزانہ ایک پوسٹ کرکے اس ظلم کے خلاف آواز اٹھائے تاکہ عوامی سطح پر اس مسئلے کو اجاگر کیا جا سکے اور ذمہ داروں کو جواب دہ بنایا جا سکے۔

آخر میں، انہوں نے تاکید کی کہ انسانی حقوق کی حفاظت اور مظلوموں کی حمایت ہر قوم اور فرد کا فرض ہے۔ ماہ جبین اور ان کے بھائی کی بازیابی کے لیے ہر ممکن کوشش جاری رہے گی اور ہم سب کو مل کر اس ظلم کے خلاف آواز بلند کرنی چاہیے تاکہ ان کی فوری رہائی ممکن بنائی جا سکے۔