نوآبادکار کا ایندھن یا نوآبادیاتی نظام کا خاتمہ – شہیک بلوچ

تحریر:- شہیک بلوچ

نوآبادیاتی نظام کا پردہ چاک کرتے ہوئے اکیل میمبے اپنی کتاب Necro politics میں لکھتے ہیں کہ
"نوآبادیاتی تشدد نے محکوموں کی خواہش کی طاقت پر قبضہ کرنے اور اسے غیر پیداواری سرمایہ کاری میں منتقل کرنے کا کام کیا۔”
غیر پیداواری سرمایہ کاری جہاں اپنی شناخت سے بیگانگی کی راہ کو ہموار کرتی ہے وہی دیسی کو غلامی برداشت کرنے کا درس دیتی ہے۔ اپنی گلزمین ، اپنے قوم سے بیگانہ ہوکر نیشنلزم سے دور ہوکر الجھا ہوا دیسی جو میمبے کے بقول "بے دنیا(دنیا سے کٹا ہوا) اور بے مٹی (مٹی سے کٹا ہوا) جسم، آتش گیر توانائی کا ایک جسم، ایک قسم کی دوہری نوعیت جو کام کے ذریعے، ایک دستیاب ذخیرے میں تبدیل ہو سکتی ہے۔”
یہی وہ نقطہ ہے جہاں بے روح دیسی ایک اتش گیر توانائی کے باوجود نوآبادکار کے Necro politics یعنی Death politics کا ذخیرہ بن جاتا ہے کیونکہ وہ
ایک غیر پیداوار سرمایہ کاری کے ذریعے نوآبادکار کا commodity بن چکا ہے۔ دوہرے کردار میں مذہب کے نام پر، طبقات کے نام پر، قبائلیت کے نام پر یہ غیر پیداوار سرمایہ کاری نوآبادکار کے لیے بہت بڑے منافع کا آتش گیر سرمایہ بن جاتی ہے جس کے ذریعے وہ نیشنلزم تک پہنچنے کے راستے کو دھندلا بنا دیتا ہے اور یوں دیسی مختلف سطحوں میں الجھتا ہے۔ یہ الجھن اس لیے برقرار رہتی ہے کیونکہ دیسی اس نیشنلزم کو جو اس کے شناخت کو حاصل کرنے کا واحد راستہ ہے جو اسے دوہری غیر پیداوار سرمایہ کاری کی بجائے تاریخ مجسم کی حیثیت عطاء کرتا ہے اس سے نظریں چھرا لیتا ہے اور مختلف سطحوں پر الجھتا چلا جاتا ہے اور یوں اتحاد کی ضرورت کو محسوس کرنے کے باوجود اتحاد کی جانب نہیں بڑھ پاتا۔
نوآبادکار شاطر ہوتا ہے وہ مذہب سے لے کر ہر نظریہ اور ہر ازم کو بروئے کار لاتا ہے لیکن دیسی نوآبادکار کے اس شاطر پن کو سمجھنے اور اپنے شناخت سے جڑے رہ کر اس کے پالیسیوں کو ناکام کرنے کی بجائے سطحی تجزیے پیش کرتا ہے۔ میں اور تم کی سطح پر سے آگے بڑھ کر ہم کی سطح تک پہنچنے اور غیر پیداواری سرمایہ بننے سے انکار کرنے کے لیے واحد سہارا نیشنلزم ہی دے سکتی ہے۔ یہی وہ شناخت ہے جو اسے نوآبادکار کے سامنے کھڑا کرتی ہے باقی سب کچھ دھوکا ہے، دھوکا اس لیے کہ نیشنلزم کے علاوہ باقی تمام نظریات دیسی کو تقسیم کرتی ہیں جبکہ نیشنلزم دیسی کو متحد کرتا ہے بلکہ اس کے تحریک کو فیصلہ کن بنانے میں بنیادی کردار ادا کرتا ہے۔ نیشنلزم کی بنیاد پر دیسی game changer بن جاتا ہے اب موت کا کھیل دیسی کی دہرتی پر ضرور ہوگا لیکن خون نوآبادکار کا اور اس کے پالیسیوں کا بہے گا اور نیشنلزم کی بنیاد پر دیسی کا وار نوآبادکار کی جڑیں ہلا کر رکھ دے گا۔
اب تک جہاں نوآبادکار کے طاقت کے ماتحت دیسی کی خواہشات کا تعین ہورہا تھا اب یہ تعین غیر پیداوار سرمایہ دیسی نہیں بلکہ ایک تاریخی کردار دیسی کرے گا جو اپنے شناخت سے جڑا ہے اور واضح الفاظ میں نوآبادکار کو بتاتا ہے کہ اب تمہارے طاقت کا رخ تمہاری جانب موڑ دیا گیا ہے، نہ یہ دھرتی تمہاری ہے، نہ یہ قوم مزید تمہاری غلام ہے اور نا ہی اب تم مزید اپنے موت کا کھیل کھیل سکو گے۔ وہی دھرتی جہاں پہلے دیسی کے لیے گھٹن زدہ تھا اب نوآبادکار کے لیے گھٹن زدہ بن جاتا ہے۔
دیسی کو فیصلہ کن کردار کی جانب بڑھنا ہوگا تب ہی وہ نوآبادیاتی نظام سے چھٹکارا حاصل کرسکتا ہے وگرنہ غیر پیداوار سرمایہ بن کر وہ نوآبادکار کا آتش گیر ذخیرہ ہی رہے گا اور نوآبادکار اسے اپنی نوآبادیاتی تسلط کو دوام دینے کے لیے استعمال کرتا رہے گا۔
اب فیصلہ دیسی کے ہاتھ میں ہے کہ وہ نوآبادیاتی نظام کا ایندھن بننا چاہتا ہے یا نیشنلزم سے جڑ کر متحد ہوتے ہوئے نوآبادیاتی نظام کا خاتمہ چاہتا ہے؟