وڈھ: امن فورس کی فائرنگ سے ایک نوجوان جاں بحق، ایک زخمی

وڈھ: امن فورس کی فائرنگ سے ایک نوجوان جاں بحق، ایک زخمی

وڈھ بازار میں فائرنگ کے ایک واقعے میں ایک نوجوان جاں بحق جبکہ ایک زخمی ہوگیا۔ تفصیلات کے مطابق دونوں نوجوان موٹر سائیکل پر آر سی ڈی ہائی وے سے گزر رہے تھے کہ مقامی افراد کے مطابق امن فورس کی جانب سے ان پر فائرنگ کی گئی، جس کے نتیجے میں جلیل رمدانزئی جاں بحق جبکہ ولی محمد میراجی زخمی ہوگئے۔

امن فورس کا مؤقف ہے کہ مذکورہ افراد سپلائی گاڑیوں پر حملہ کر رہے تھے، جبکہ مقامی افراد کا دعویٰ ہے کہ نوجوانوں پر فائرنگ بلااشتعال کی گئی۔

دوسری جانب بعض ذرائع کے مطابق جاں بحق اور زخمی ہونے والے دونوں نوجوان میر جاوید مینگل سے وابستہ تھے۔ واقعے کی مزید تحقیقات جاری ہیں، جبکہ مزید تفصیلات سامنے آنے کا انتظار ہے۔

یہ امر بھی قابلِ ذکر ہے کہ وڈھ بازار کے گرد جاری حالیہ تنازع کے دوران اب تک کسی جانی نقصان کی اطلاع نہیں تھی۔ آج کے واقعے میں ایک نوجوان کی ہلاکت اور دوسرے کے زخمی ہونے کو صورتحال میں مزید بگاڑ اور کشیدگی میں خطرناک اضافے کے طور پر دیکھا جا رہا ہے، جس سے خدشہ ہے کہ جاری تنازع مزید سنگین رخ اختیار کر سکتا ہے۔