ہم حق پر ہیں، اپنی جدوجہد جاری رکھیں گے۔ جیئند بلوچ

ہم حق پر ہیں، اپنی جدوجہد جاری رکھیں گے۔ جیئند بلوچ

بلوچ اسٹوڈنٹس آرگنائزیشن کے چیئرمین جیئند بلوچ نے حالیہ جبری گمشدگی سے رہائی کے بعد اپنے پہلے بیان میں کہا ہے کہ بلوچستان میں جبری گمشدگیاں، ماورائے عدالت قتل اور خونریزی کوئی نئے واقعات نہیں بلکہ ایک معمول بن چکے ہیں، تاہم وہ اور ان کے ساتھی اپنی جائز اور جمہوری جدوجہد جاری رکھیں گے۔

جیئند بلوچ کے مطابق وہ بطور طالب علم رہنما تین مرتبہ جبری گمشدگی، تشدد اور غیر انسانی و غیر آئینی سلوک کا سامنا کر چکے ہیں۔

ان کا کہنا تھا کہ پہلی مرتبہ 2018 میں تقریباً نو ماہ تک لاپتہ رہے، جس دوران مبینہ تشدد اور اذیت کے باعث ان کی جسمانی و ذہنی صحت شدید متاثر ہوئی اور وہ آج تک اس کے اثرات سے مکمل طور پر باہر نہیں نکل سکے۔

انہوں نے بتایا کہ دوسری مرتبہ 2024 میں راجی مچی کی تیاریوں کے دوران انہیں اٹھایا گیا، جبکہ حالیہ مرتبہ 24 جولائی 2026 کو انہیں ان کے گھر سے گرفتار کرنے کے بعد لاپتہ کر دیا گیا۔

جیئند بلوچ نے کہا کہ جبری گمشدگیوں اور گرفتاریوں کے اثرات صرف ان تک محدود نہیں رہے بلکہ ان کے اہلِ خانہ کو بھی شدید ذہنی اذیت اور کرب سے گزرنا پڑا۔ ان کے بقول انہوں نے ہر بار حراست کے دوران اپنی جدوجہد اور سرگرمیوں کا جائزہ لیا، تاہم انہیں کبھی کوئی ایسا عمل نظر نہیں آیا جسے وہ غیر آئینی یا غیر قانونی قرار دیں۔

انہوں نے کہا کہ انہوں نے ہمیشہ جمہوری دائرۂ کار میں رہتے ہوئے طلبہ کے حقوق اور اپنے قومی فریضے کے طور پر سیاسی جدوجہد کی، تاہم اس جدوجہد کو سنگین جرم تصور کرتے ہوئے انہیں بار بار حراست میں لیا گیا۔

بی ایس او کے چیئرمین نے کہا کہ بار بار کی جبری گمشدگیوں اور ریاستی جبر کے تجربے کے بعد وہ اس نتیجے پر پہنچے ہیں کہ آئین و قانون کے مخالف سمت میں وہ نہیں بلکہ آئین کے پاسدار ہونے کے دعوے دار ادارے کھڑے ہیں۔

انہوں نے کہا کہ ’’ہم حق پر ہیں، ہم اپنی جائز جدوجہد کا حصہ ہیں اور ہم آئینی راستے پر ہیں، اس لیے ہم اپنی روش نہیں بدلیں گے۔‘‘

جیئند بلوچ نے مطالبہ کیا کہ ریاستی ادارے اپنا رویہ تبدیل کریں، غیر قانونی اقدامات ترک کریں اور اپنی آئینی حدود میں رہ کر کام کریں۔ ان کا کہنا تھا کہ وہ اپنے جمہوری حقوق اور جمہوری جدوجہد سے دستبردار نہیں ہوں گے اور زندہ رہنے اور آزادانہ زندگی گزارنے کے حق سے بھی دستبردار نہیں ہوں گے۔

انہوں نے اپنے بیان کے آخر میں اپنی جبری گمشدگی کے خلاف آواز اٹھانے والے افراد، اپنے خاندان اور بی ایس او کے ساتھ اظہارِ یکجہتی کرنے والوں کا شکریہ ادا کرتے ہوئے کہا کہ ’’جدوجہد جاری رہے گی۔