بلوچستان کو آگ اور خوف کا میدان بنانا، عام آبادیوں پر ڈرون اور فضائی بمباری کھلی ریاستی جارحیت ہے۔ بی وائی سی

بلوچ یکجہتی کمیٹی نے بیان جاری کرتے ہوئے کہا ہے کہ بلوچستان کے شہر مستونگ کے علاقے کھڈ کوچہ میں 9 اکتوبر کو ایک گھر کے سامنے ڈرون حملے کے نتیجے میں جاوید حماد ولد شیر محمد شاہوانی اور اللہ بخش ولد کبیر حماد شدید زخمی ہوگئے۔ عام شہریوں کے گھروں اور آبادیوں کے قریب ہونے والے ایسے حملے اس بنیادی سوال کو جنم دیتے ہیں کہ بلوچستان میں عام انسانوں کی جانیں آخر کب تک خوف، تشدد اور عدم تحفظ کے سائے میں رہیں گی۔

بی وائی سی نے کہا ہے کہ بلوچستان میں عام آبادیوں پر ڈرون اور جیٹ طیاروں کے ذریعے حملے محض سکیورٹی کارروائیوں کا معاملہ نہیں، بلکہ شہریوں کے تحفظ، انسانی وقار اور بنیادی حقوق کا سنگین مسئلہ ہیں۔ کسی بھی سیاسی یا عسکری جواز کو عام شہریوں کی زندگیوں اور سلامتی کو نظرانداز کرنے کا جواز نہیں بنایا جا سکتا۔ گھروں کو خوف کی علامت اور آبادیوں کو میدانِ جنگ میں تبدیل کرنا لوگوں کے بنیادی حقِ زندگی اور تحفظ کو خطرے میں ڈالتا ہے۔

مزید کہا ہے کہ بلوچستان کے عوام کوئی جنگی ہدف نہیں، وہ انسان ہیں، جنہیں امن، تحفظ اور باوقار زندگی گزارنے کا حق حاصل ہے۔ عام آبادیوں پر حملوں کا سلسلہ بند ہونا چاہیے، زخمی شہریوں کو انصاف ملنا چاہیے اور ایسے واقعات کی آزادانہ تحقیقات کے ذریعے ذمہ داروں کا احتساب یقینی بنایا جانا چاہیے۔