افکارِ خیربخش کے چند زاویے۔ منتظر بلوچ

تحریر:-منتظر بلوچ

تاریخ فلسفہ میں ہیگل اور مارکس دونوں فطری ارتقائی عمل کو مدنظر رکھتے ہوئے تاریخ کے اندر موجود "کلیت” کے تصور کو زیرِ بحث لاتے ہیں یہ "کلیت” سماج کے اندرونی تضاد سے پھوٹتا ہے۔ کُلیت کی طرف سفر مختلف تاریخی مراحل سے گزر کر ایک آفاقی رنگ اختیار کرتا ہے بہ الفاظ دیگر مارکسی دانشور ٹیری ایگلٹن کے بقول ” خود مارکس نے بھی کبھی تصور نہیں کیا تھا کہ فلاکت زدہ حالات میں سوشلزم کی منزل حاصل کی جاسکتی تھی اس قسم کے پروجیکٹ کا سوچنا ایسا ہی تھا جیسے قرونِ وسطیٰ میں انٹرنیٹ ایجاد کرنا”۔خیربخش مری جب کہتے ہیں کہ "بلوچستان کا مستبقل سوشلزم ہوگا” تو یہ بجائے پنجابی و چائینیز "مزدور” (استعماری آلے) کے خیرخواہ ہونے کے بلوچ سماج کے اندرونی تضادات اور تاریخی فطری ارتقاء کو مدنظر رکھتے ہوئے "کُلیت” کی طرف بڑھنے کا فطری عمل ہے۔خیربخش مری نے واضح الفاظ میں کہا کہ "پنجاب کا کوئی بھی طبقہ بلوچستان آتا ہے تو اشرافیہ کی صورت اختیار کرلیتا ہے” یہاں سے ان کی محکومیت اور مزدور پن کا بھانڈا پھوٹتا ہے ۔ان کا کہنا کہ اندرونی تضادات موجود ہیں لیکن لوگ انہیں بیان کرکے اصل مسئلہ یعنی چوہدری کو راہ فرار کا موقع فراہم کرتے ہیں اس فکر و عمل کی مکمل غمازی کرتا ہے جو بلوچ قوم و وطن کو بحیثیت قوم ، آزادی اور خودمختاری کی طرف لے جاتا ہے۔

مارکسی یا لبرل رجحانات رکھنے والے نظریاتی و عملی سطح پر بھی اسی آئیڈیالوجی کے پابند ہو یہ بہر طور ضروری نہیں ۔ سارتر اشتراکی رجحانات رکھنے کے باوجود اپنے فکر میں انفرادی جوہر اور وجودیت کے رہنما جانے اور مانے جاتے ہیں عین اسی طرح جرمنی کے نازیوں کی پارٹی ” نازی سوشلسٹ پارٹی ” اپنے نام کی وجہ سے کسی بھی طور اشتراکی نہیں ہوا جبکہ رجحان کا اظہار پارٹی کے نام سے بھی ہوتا ہے۔خیربخش مری قومیت اور قومی آزادی کے بغیر بین الاقوامیت کو فریبِ محض سمجھتے تھے اس لیئے انہوں نے کسی بھی دوسرے قوم کی مزدور کے مسئلے کو بلوچ قومی مسئلے کے ساتھ نتہی نہیں کرتے۔بلوچ دانشور صورت خان مری کی حال ہی میں شائع کی گئی کتاب "ان کہی” میں "خیربخش مری کے ساتھ مکالمہ” میں واضح طور پر بابا مری کہتے ہیں "قومی آزادی کی تحریک کثیر الجہتی اور کثیر الطبقاتی ہوتی ہے۔”

اعمال و افکار کو ان کے متعلقات ، سیاق اور تناظر سے کاٹ کر دیکھنے کا رواج نہ صرف ہمارے ہاں پایا جاتا ہے بلکہ مغرب میں بھی یہ رویہ عام رہا ہے، جیسے مشہور فرنچ شاعر بادلیئر کو پہلے پہل "مصنوعی شیطان پرستی ” کا مجرم قرار دیا گیا ، پھر اسے جمال پرست اور مظاہر پرست سمجھا جانے لگا ، اس کے بعد بادلیئر کو پاسکل کی طرح ایک پیدائشی صوفی سمجھا جانے لگا جو خدا سے شدید قربت رکھتا ہے۔ یہاں اخباری لکھاریوں اور صحافتی مداریوں کی طرف سے بھی خیربخش مری کو کبھی صوفی ، کبھی قبائلی رہنما تو کبھی سوشلسٹ قرار دیا گیا سونے پہ سہاگہ یہ کہ دانشوری کی میت اٹھائے یہ ملنگ خود کو بابا مری کے سیاسی وارث اور انہی کے کیمپ کا جزو لاینفک سمجھتے ہیں ۔خیربخش مری کی فکری اور عملی جہتیں بلوچ ، بلوچیت اور قومی تحریک آزادی کی مدار میں گردش کرتے ہوئے دن بہ دن حقیقت کی واضح سے واضح تر تصویر پیش کرتا آرہا ہے۔

جاری۔