ریاستی جبر و استبداد اس قدر بڑھ چکا ہے کہ اب ہمیں اپنے شہداء کی لاشوں کے لیے بھی مزاحمت کرنی پڑ رہی ہے. بلوچ یکجہتی کمیٹی

ریاستی جبر و استبداد اس قدر بڑھ چکا ہے کہ اب ہمیں اپنے شہداء کی لاشوں کے لیے بھی مزاحمت کرنی پڑ رہی ہے. بلوچ یکجہتی کمیٹی

ریاستی جبر و استبداد اس قدر بڑھ چکا ہے کہ اب ہمیں اپنے شہداء کی لاشوں کے لیے بھی مزاحمت کرنی پڑ رہی ہے۔ بلوچ قوم طویل عرصے سے ایک جابر ریاست کے ظلم و ستم کا شکار ہے، جہاں ہمیں بطور بلوچ اپنی قومی روایات، شناخت، اور اقدار سے محروم رکھا جا رہا ہے۔ ایک سوچے سمجھے منصوبے کے تحت بلوچ قوم کو اس کی قومی بقاء کی جدوجہد، زبان، ثقافت اور اجتماعی زندگی کے تمام پہلوؤں سے دور رکھنے کی کوشش کی کی جارہی ہے۔ یہ محرومی محض ثقافتی یا سماجی سطح تک محدود نہیں، بلکہ گزشتہ دو دہائیوں سے بدترین نسل کشی کی صورت میں جاری ہے، جہاں قتل و غارت، جبری گمشدگی اور ریاستی تشدد روز کا معمول بن چکا ہے۔ اب تو نوبت یہاں تک پہنچ چکی ہے کہ ہمارے شہداء کی لاشیں بھی لاپتہ کی جا رہی ہیں۔

ہمارے لیے بطور قوم زندگی گزارنا ایک کٹھن آزمائش بن چکا ہے۔ بلوچستان کا ہر گھر جنگ زدہ، غمزدہ اور ریاستی تشدد کا شکار ہے۔ آج بلوچستان میں معصوم بچے سڑکوں پر پرورش پا رہے ہیں، بوڑھی مائیں اپنے لاپتہ پیاروں کی راہ تکتے تکتے عمر کی آخری سانسیں گن رہی ہیں۔ ہر طرف گولیوں کی بوچھاڑ، تشدد کا دھواں اور ماؤں بہنوں کی دلخراش چیخ و پکار سنائی دیتی ہے۔ کئی گھروں کے چراغ اذیت گاہوں کے تاریک کمروں میں قید ہیں، اور زندگی ایک مستقل عذاب بن چکی ہے۔ ایسے حالات میں ہم اپنی قومی شناخت، رسم و رواج اور روایات کے مطابق زندگی گزارنے کا تصور بھی نہیں کر سکتے۔

ہم ایک جابر ریاست کے ہاتھوں بدترین مظالم کا سامنا کر رہے ہیں، جن میں قتل عام، جبری گمشدگی، جعلی مقابلے، اور ہماری قومی اقدار سے محرومی شامل ہیں۔ آج یہ ایک المناک حقیقت بن چکی ہے کہ ہمارے شہداء کی لاشیں بھی غائب کی جا رہی ہیں۔ ہمیں اپنے پیاروں کی تدفین اور ان کے لیے فاتحہ خوانی کی اجازت بھی نہیں دی جا رہی۔ لیکن غیرتمند بلوچ عوام ان تمام مظالم کے باوجود مزاحمت کر رہے ہیں۔ ہمیں سمجھنا ہوگا کہ یہ صرف ظلم نہیں بلکہ ایک منظم نسل کشی ہے، جس کے ذریعے ہماری قومی بقا کو خطرے میں ڈالا جا رہا ہے۔

ریاست پاکستان نے 18 یا 19 مارچ کی شب تیرہ لاش کوئٹہ کے ایک قبرستان میں نامعلوم افراد کے طور پر دفن کیے تھے اور کچھ لاشوں کو سول ہسپتال کے سرد خانے میں رکھا تھا۔ جس پر جبری گمشدہ افراد کے لواحقین کا صرف ایک سادہ مطالبہ تھا کہ ان لاشوں کی شناخت کرائی جائے، کیونکہ ریاست ہر مسلح حملے کے بعد جبری گمشدہ افراد کو قتل کرکے ان کی لاشیں مسلح افراد کے ساتھ رکھ کر جعلی مقابلے کا دعویٰ کرتی ہے۔ اس لیے یہ ضروری تھا کہ شناخت کا عمل مکمل کیا جائے تاکہ یہ معلوم ہو سکے کہ کہیں ان کے پیارے بھی ان میں شامل تو نہیں۔ اس مطالبے کے جواب میں پاکستان کی فوج اور خفیہ اداروں نے ظلم و بربریت کی نئی مثال قائم کی۔ جبری گمشدگان کے لواحقین کو سول اسپتال سے غیر قانونی طور پر گرفتار کر کے لاپتہ کر دیا گیا۔ اسی رات بلوچ یکجہتی کمیٹی کے مرکزی رہنما بیبگر بلوچ کو بھی جبراً لاپتہ کر دیا گیا، جو تاحال لاپتہ ہیں۔

21 مارچ کو بیبگر بلوچ اور دیگر لاپتہ افراد کی بازیابی کے لیے احتجاج کرنے والوں پر فورسز نے اندھا دھند فائرنگ کی، جس کے نتیجے میں تین نو عمر نوجوان شہید اور متعدد زخمی ہو گئے۔ شہداء کے لواحقین نے انصاف کے لیے دھرنا دیا، مگر 22 مارچ کی صبح ریاستی فورسز نے اس پر بھی حملہ کر دیا۔ اس دوران بلوچ یکجہتی کمیٹی کی سربراہ ڈاکٹر ماہرنگ بلوچ، بیبو بلوچ، ڈاکٹر ماہرنگ بلوچ کی کمسن بہن اور ایک کمسن کزن کو جبراً گرفتار کر لیا گیا اور دھرنے میں موجود لاشیں بھی زبردستی اٹھا لی گئیں۔ اب ڈاکٹر ماہرنگ بلوچ جھوٹے مقدمات میں قید ہیں، اور ستم ظریفی یہ ہے کہ ان پر مزید تین قتل کے مقدمات درج کر دیے گئے ہیں۔