نیشنلزم، شناخت اور اتحاد

نیشنلزم، شناخت اور اتحاد۔

تحریر: شہیک بلوچ

"بلوچ قوم میں شعور کی کمی ہے اور سب کے ذہن الگ الگ ہیں۔ سب اپنے طور پر حق مانگ رہے ہیں، کوئی مزدوری مانگ رہا ہے تو کوئی پورا کارخانہ چاہتا ہے۔اس جنگ میں جیت کس کی ہوگی،میں حتمی طور پر کچھ نہیں کہہ سکتا۔”
(بابا مری)
نیشنلزم ایک جامع نظریہ ہے جس کی بنیاد پر کئی سیاسی و سماجی تحریکیں اٹھی، منتشر و منقسم سماج کو اکھٹا کیا گیا، محکوم قومیتوں نے اپنی آزادی حاصل کی۔ آج بھی دنیا میں کئی باشعور قومیں نیشنلزم کو بنیاد بنا کر اپنے شناخت کے لیے برسرپیکار ہیں، بلوچ قوم اس کی ایک زندہ مثال ہے۔
نیشنلزم کی تاریخ یہ بھی واضح کرتی ہے کہ قومی شناخت ارتقائی عمل کا کوئی عارضی حصہ نہیں بلکہ ایک پائیدار شعوری مرحلہ ہے جہاں منقسم سماج ایک منظم قوت کی اکائی میں ابھر کر سامنے آتی ہے۔
یورپ میں صنعتی انقلاب کی صورت میں نیشنلزم ابھرا اور یورپ میں نیشنلزم کی بنیاد پر خاطرخواہ ترقی ہوئی۔ کسی نظریہ کی اہمیت کو ارتقائی عمل میں نظر انداز نہیں کیا جاسکتا نا ہی اسے سیاہ و سفید کے خانے میں رکھا جاسکتا ہے۔ اگر ایسا کیا جاتا ہے تو اس کے نتائج گمراہ کن ثابت ہوتے ہیں۔
ہمارے یہاں المیہ یہ رہا ہے کہ تاریخی پس منظر سے ہٹ کر چند نعروں کی عینک سے قومی سوال کو سیاہ و سفید کے خانوں میں رکھنے کی ناکام کوشش کی جاتی ہے۔ لیفٹ کا رویہ انتہائی ژولیدگی کا رہا ہے۔ کہ قومی سوال کو طبقاتی بنیادوں پر حل کیا جائے. سوال یہ پیدا ہوتا ہے کہ جس سوال کی بنیاد ہی قومی ہو اس کو طبقاتی بنیادوں پر کیسے حل کیا جاسکتا ہے؟
قومی شناخت ہرگز شائونزم نہیں نا ہی بلوچ قومی تحریک کو نسل پرستی کا نام دیا جاسکتا ہے بلوچ قوم اپنی شناخت کی جنگ نوآبادکار کے خلاف لڑ رہا ہے جس نے پچھتر سالوں سے بلوچ قوم کو ایک کسمپرسی کی حالت میں مبتلا رکھا ہے، وسائل کا بے دریغ استحصال، ایٹمی دھماکوں سے لے کر کیمیائی ہتھیاروں تک کا استعمال، اپنے ففتھ کالمسٹ سہولت کاروں کے ذریعے سماج کو مزید جرائم کی جانب دھکیلنا یہ وہ حقائق ہیں جن سے نظریں نہیں چرائی جاسکتی اور ان کا خاتمہ قومی تحریک ہی کرسکتی ہے۔ نیشنلزم کی بنیاد پر متحد ہوکر ایک قوم کی حیثیت سے قومی فیصلے ہی دیرپا ثابت ہوسکتے ہیں۔
نیشنلزم قوم کو ہم آہنگ کرنے کے لیے ضروری ہے تاکہ چھوٹے اختلافات تحریک پر حاوی ہونے کی بجائے سنجیدگی سے حل ہوسکے، جدلیاتی تناظر میں شناخت کو اتحاد کی صورت میں پرونے کی ضرورت ہے اور زمینی حقائق کو مدنظر رکھتے ہوئے نیشنلزم کا نظریہ ہی یہ کام سرانجام دے سکتا ہے۔
ایک قوم کی حیثیت سے وہ منزل حاصل کرنا جس کی نشاندہی بابا مری جیسے دوراندیش رہبر نے کی اور قومی مزاج کو سمجھتے ہوئے انہوں نے یہ اندیشہ ظاہر کیا کہ اگر اجتماعی نقصان کا احساس نہ کیا تو بہت تکلیف اٹھانی پڑے گی۔ آج بلوچ کی تکالیف میں اضافہ بیرونی جارحیت سے زیادہ نیشنلزم سے ہٹنے کی وجہ سے ہے۔ بلوچ قوم میں مستقبل بینی کو لے کر اپنی خواہشات کے مطابق تشریحات کی ایک طویل فہرست ملتی ہے لیکن مستقبل بینی سے حال کے تضادات کا سامنا نہیں کیا جاسکتا۔ جہاں ٹیری ایگلٹن لکھتے ہیں کہ مارکس مستقبل پیمائی سے زیادہ حال کے تضادات کو حل کرنے میں دلچسپی رکھتا تھا وہی آج ہمارے دانشور و لیڈر حال کے تضادات کو سمجھنے اور حل کی بجائے مستقبل پیمائی میں مشغول نظر آتے ہیں، اسی لیے حال کے تضادات ہمیں مزید الجھاتے جارہے ہیں اور ہم آہنگی کی گنجائش کم اور گروہانہ اختلافات میں اضافہ ہوتا جارہا ہے۔
ہمیں یہ سمجھنا ہوگا کہ جب تک ہم اپنی شناخت کو اتحاد کی بنیاد بنا کر آگے بڑھنے کی کوشش نہیں کریںگے تب تک ہم ایک متحد کل کی صورت میں کسی بہتر نتیجے تک نہیں پہنچ سکتے۔ یہی تاریخ کا اہم سبق ہے۔ اگر تاریخ سے شناخت کو نکال دیا جائے تو ہیگل کے جدلیات کی روشنی میں دونوں ہی ختم ہوجاتے ہیں کیونکہ تاریخ کی بنیاد ہی جدلیات پر ہے۔ تاریخ سے شناخت کو اور شناخت سے تاریخ کو کسی صورت خارج نہیں کیا جاسکتا، اور حال کے تضادات کو سمجھنے کے لیے یہ سمجھنا ضروری ہے۔
بلوچ نیشنلزم مکمل اور جامع نظریہ ہے اور بابا مری جیسے دوراندیش رہبر کی تعلیمات کی روشنی میں بلوچ قوم اپنے شناخت کو لے کر متحد ہوسکتی ہے۔ اگر نیشنلزم کی روٹ سے ہٹ کر مستقبل پیمائی کا ایڈونچر برقرار رکھا گیا تو تکالیف میں اضافہ ہی ہوگا۔