ایران کی جارحیت روکنے کا واحد راستہ محکوم اقوام کی آزادی ہے.حیربیار مری

ایران کی جارحیت روکنے کا واحد راستہ محکوم اقوام کی آزادی ہے.حیربیار مری

بلوچ قوم پرست رہنما حیربیار مری نے اپنے ایکس اکاؤنٹ پر جاری بیان میں کہا ہے کہ آبنائے ہرمز میں تجارتی جہازوں پر ایران کے حالیہ حملے ایک اور خطرناک مگر دانستہ اشتعال انگیزی ہیں، جو عالمی تجارت اور علاقائی سلامتی کے لیے خطرہ ہیں۔ ان کے مطابق ایسے جارحانہ حملے اس بات کی عکاسی کرتے ہیں کہ مغرب کی برسوں پر محیط مفاہمتی پالیسی اور ناکام سفارت کاری نے ایران کے رویے میں بہتری لانے کے بجائے تہران کو مزید حوصلہ دیا ہے۔

حیربیار مری نے کہا کہ ایران کئی دہائیوں سے بلوچوں، اہوازی عربوں، آذربائیجانی ترکوں اور دیگر محکوم اقوام کو دباتا آ رہا ہے، جبکہ اب اس کی جارحیت اس کے زیرِ قبضہ علاقوں سے آگے بڑھ کر خلیجی ممالک اور آبنائے ہرمز تک پھیل رہی ہے تاکہ وہ اپنی بالادستی اور قبضے کو مزید وسعت دے سکے۔

انہوں نے مزید کہا کہ ٹرمپ انتظامیہ کو چاہیے تھا کہ وہ تہران کے خطے کو غیر مستحکم کرنے والے رویے کا بہت پہلے اور زیادہ جرات کے ساتھ مقابلہ کرتی، کیونکہ بار بار کیے گئے معاہدے ایران کے طرزِ عمل کو تبدیل کرنے میں ناکام رہے۔ ان کے بقول، امریکہ اور ایران کے درمیان مفاہمتی یادداشت (ایم او یو) پر دستخط ہونے کے بعد 40 بلوچ جبری طور پر لاپتہ کیے گئے اور قتل کر دیے گئے۔

حیربیار مری نے کہا کہ اگر امریکہ ایران کے زیرِ قبضہ اقوام کے ساتھ تعاون کرتا اور انہیں صرف اپنا دفاع کرنے کا کہنے کے بجائے ان کی عملی مدد کرتا، تو ملاں حکومت کا خاتمہ زیادہ مؤثر انداز میں ممکن تھا۔ انہوں نے کہا کہ اب بھی دیر نہیں ہوئی، اور ایرانی حکومت کو محدود کرنے کا سب سے آسان طریقہ یہ ہے کہ محکوم اقوام کی حمایت کی جائے اور انہیں اپنی آزادی دوبارہ حاصل کرنے کے لیے بااختیار بنایا جائے۔ ان کے مطابق، جب بلوچستان، کردستان، الاحواز اور جنوبی آذربائیجان آزاد ہوں گے تو فارسی بالادستی اور دھونس کا بھی خاتمہ ہو جائے گا۔