بلوچستان ایک دن میں 44 ٹریفک حادثات، 77 افراد زخمی

بلوچستان ایک دن میں 44 ٹریفک حادثات، 77 افراد زخمی

بلوچستان: مختلف شاہراہوں پر گزشتہ 24 گھنٹوں کے دوران 44 ٹریفک حادثات پیش آئے جن کے نتیجے میں 77 افراد زخمی ہوئے۔

میڈیکل ایمرجنسی ریسپانس سینٹر کی رپورٹ کے مطابق سب سے زیادہ حادثات ژوب اور خضدار کی شاہراہوں پر رپورٹ ہوئے۔ این-50 ژوب پر 11 حادثات میں 22 افراد جبکہ این-25 خضدار پر 10 حادثات میں 15 افراد زخمی ہوئے۔

این-25 مستونگ پر 4 حادثات میں 5 افراد، جبکہ قلات، زیارت، ژوب اور سبی کی شاہراہوں پر مجموعی طور پر 12 افراد زخمی ہوئے۔ مزید برآں لسبیلہ، وندر، سرانان، شیرانی، سوراب، کیچ، پنجگور، واشک، بارکھان اور نوشکی میں ایک، ایک حادثہ رپورٹ ہوا جن میں 20 افراد زخمی ہوئے۔

رپورٹ میں کہا گیا ہے کہ حادثات کی بڑی وجوہات تیز رفتاری، سڑکوں کی خستہ حالی اور ٹریفک قوانین کی خلاف ورزی ہیں۔ شہریوں نے حکومت سے مطالبہ کیا ہے کہ قومی شاہراہوں کی حالت بہتر بنائی جائے اور قوانین پر سختی سے عمل درآمد کیا جائے تاکہ قیمتی انسانی جانوں کا ضیاع روکا جا سکے۔