بلوچستان: خاران اور سوراب میں حملوں، آپریشن، بس فائرنگ اور ٹریفک حادثے کی اطلاعات

بلوچستان: خاران اور سوراب میں حملوں، آپریشن، بس فائرنگ اور ٹریفک حادثے کی اطلاعات

ذرائع کے مطابق خاران کے علاقے نوروز قلات میں خاران-کوئٹہ شاہراہ پر زومی کے مقام پر پاکستانی فوج کے متعدد گاڑیوں پر مشتمل قافلے پر نامعلوم مسلح افراد نے حملہ کیا۔ پاکستانی فوجی اہلکاروں کی جانی نقصانات کی اطلاعات ہیں۔

سوراب کے علاقے نغاڑ میں کنڈ کے مقام پر پاکستانی فورسز پر مسلح حملے کی اطلاعات ہیں۔ ذرائع کے مطابق موٹر سائیکلوں پر گشت کرنے والے اہلکاروں کو نشانہ بنایا گیا۔

مقامی ذرائع کے مطابق سوراب کے علاقے نغاڑ میں پاکستانی فورسز نے آپریشن کیا، جس کے دوران متعدد مقامات پر کارروائیاں کی گئیں۔ ذرائع کا کہنا ہے کہ کئی بلوچ نوجوانوں کو تشدد کا نشانہ بنایا گیا جبکہ متعدد افراد کو حراست میں بھی لیا گیا۔ تاہم زیرِ حراست افراد کی شناخت اور تعداد کی باضابطہ تصدیق نہیں ہو سکی۔

خاران-کوئٹہ روڈ پر برشونکی کے مقام پر نامعلوم مسلح افراد نے زیرِ تعمیر سڑک منصوبے پر حملہ کرکے تعمیراتی مشینری کو آگ لگا دی، جس سے بھاری نقصان پہنچا۔ ذرائع کے مطابق حملہ آور ایک گاڑی بھی اپنے ساتھ لے گئے۔ واقعے میں کسی جانی نقصان کی اطلاع نہیں ملی۔

بختیارآباد کے قریب نیشنل ہائی وے پر ڈنگڑا کے مقام پر ٹوڈی کار اور ٹرک کے درمیان تصادم کے نتیجے میں ایک شخص جاں بحق ہوگیا۔ جاں بحق ہونے والے کی شناخت محمد اسد جمال ولد محمد اکبر جمال، سکنہ لہڑی کے نام سے ہوئی۔ ذرائع کے مطابق گاڑی سبی سے لہڑی جا رہی تھی کہ مخالف سمت سے آنے والے ٹرک سے ٹکرا گئی۔

سوراب اور بسیمہ کے درمیان گدر جوری کراس کے قریب سور چل کلغلی کے مقام پر موٹر سائیکل سوار مسلح افراد نے بس نہ روکنے پر فائرنگ کر دی۔ فائرنگ کے نتیجے میں دو مسافر زخمی ہوئے، جن میں ایک خاتون بھی شامل ہے۔ زخمیوں کو ریسکیو 1122 کے ذریعے گدر منتقل کیا گیا۔

ذرائع کے مطابق تربت سے پنجگور کے راستے کوئٹہ جانے والی المقبول بس پر بھی فائرنگ کی گئی، جس سے بس کے ٹائر برسٹ ہوگئے۔ جبکہ النعیم بس پر بھی گولیاں لگنے سے اس کے شیشے ٹوٹ گئے، تاہم تمام مسافر محفوظ رہے۔ واقعے کے بعد بسوں کو گدر اور بسیمہ کے مقامات پر روک دیا گیا۔