بلوچستان میں صحافت کو جرم بنا دیا گیا ہے، نیاز بلوچ کو فوری طور بازیاب کیا جائے۔ بلوچ واہس فار جسٹیس

صحافیوں کی جبری گمشدگیاں آزادیٔ صحافت پر سنگین حملہ ہیں۔

بلوچ وائس فار جسٹس مستونگ، بلوچستان سے تعلق رکھنے والے صحافی نیاز بلوچ کو رات تقریباً ساڑھے بارہ بجے ان کے گھر سے سیکیورٹی فورسز اور خفیہ اداروں کے اہلکاروں کی جانب سے جبری طور پر لاپتہ کیے جانے کی شدید مذمت کرتی ہے۔ خاندانی ذرائع کے مطابق، انہیں ان کی گھر سے حراست میں لے کر نامعلوم مقام پر منتقل کر دیا گیا، جس کے بعد سے ان کے اہلِ خانہ شدید تشویش اور اضطراب کا شکار ہیں۔
کسی بھی مہذب معاشرے میں صحافت کو جرم نہیں سمجھا جا سکتا۔ صحافیوں کا بنیادی فریضہ حقائق کو سامنے لانا، عوام تک درست معلومات پہنچانا، اقتدار کے ایوانوں کا احتساب کرنا اور معاشرے میں جواب دہی کو فروغ دینا ہے۔ آزاد صحافت جمہوری معاشرے کی بنیاد اور عوام کا بنیادی حق ہے۔ صحافیوں کو ان کے پیشہ ورانہ فرائض کی ادائیگی پر دھمکانا، ہراساں کرنا، تشدد کا نشانہ بنانا یا جبری گمشدگی کا شکار بنانا آزادیٔ اظہار اور آزادیٔ صحافت کے بنیادی اصولوں کی سنگین خلاف ورزی ہے۔
بلوچ وائس فار جسٹس تمام صحافتی تنظیموں، پریس کلبوں، انسانی حقوق کی تنظیموں اور آزادیٔ صحافت کے لیے کام کرنے والے بین الاقوامی اداروں سے اپیل کرتی ہے کہ وہ صحافی نیاز بلوچ کی جبری گمشدگی کا فوری نوٹس لیں، ان کی بحفاظت بازیابی کے لیے مؤثر آواز اٹھائیں اور ان کے اہلِ خانہ کو انصاف کی فراہمی کے لیے اپنا کردار ادا کریں۔
ہم مطالبہ کرتے ہیں کہ نیاز بلوچ کی فوری اور بحفاظت بازیابی یقینی بنائی جائے، ان کی گمشدگی کی شفاف تحقیقات کی جائیں اور ذمہ داروں کو قانون کے کٹہرے میں لایا جائے۔