بلوچ راجی مچی کے شہداء کی یاد میں آج سے پورا ہفتہ بلوچستان بھر میں دیوان منعقد کیے جائیں گے۔ بی وائی سی

بلوچ یکجہتی کمیٹی کی جانب سے آج سے پورا ہفتہ بلوچستان بھر میں بلوچ راجی مچی کے شہداء کی یاد میں شمعیں روشن کی جائیں گی اور راجی سوگندی دیوان کا انعقاد کیا جائے گا۔

بلوچ یکجہتی کمیٹی کے ترجمان نے کہا ہے کہ تمام زون بھرپور طریقے سے شہداء کی یاد میں دیوان کی تیاری کریں اور شہداء کو بھرپور طریقے سے خراج عقیدت پیش کریں۔ ترجمان نے کہا ہے کہ بلوچ راجی مچی کی کامیابی نے بلوچستان میں عوامی مزاحمتی جدوجہد کو ایک قدم آگے بڑھایا ہے، لیکن ہم سمجھتے ہیں کہ یہ ایک طویل اور کٹھن جدوجہد ہے جس میں مضبوط حوصلے اور اعلی شعور ہی اس جدوجہد کی کامیابی میں ہمیں مدد کرسکتے ہیں۔
آج بلوچ عوام تمام تر مشکلات اور ریاستی مظالم کے باوجود ہمت اور حوصلے کے ساتھ دھرنے کو جاری رکھے ہوئے ہیں۔

انہوں نے کہاکہ راجی مچی کو ناکام بنانے کے لیے ریاست نے وحشت اور درندگی کی بدترین مثال قائم کی، لیکن ریاستی طاقت کے سامنے بلوچ عوام نے حوصلہ اور ہمت کی وہ اعلی مثال قائم کی جس سے ریاست اور اس کے تمام اداروں کو اس بات کا ادراک ہوچکا ہے کہ عوامی طاقت ہی اصل طاقت ہے۔ عوامی طاقت کے سامنے ریاستی طاقت صرف مٹی کا ڈھیر ہے۔