بلوچستان: واشک اور مشکے میں لاپتہ افراد کی لاشیں ملنے کی اطلاعات

واشک/آواران: بلوچستان کے مختلف علاقوں میں لاپتہ افراد کی لاشیں ملنے اور دورانِ حراست قتل کیے جانے کے واقعات کی اطلاعات سامنے آئی ہیں۔

واشک کے علاقے بیسیمہ میں شاہ زیب بلوچ ولد حاتم کی لاش لواحقین کے حوالے کیے جانے کی اطلاع ہے۔ اطلاعات کے مطابق شاہ زیب کو 6 اگست 2026 کو موٹر سائیکل پر جاتے ہوئے فائرنگ کے بعد زخمی حالت میں حراست میں لیا گیا تھا، جس کے بعد وہ لاپتہ تھے۔

دوسری جانب واشک کے علاقے پتک میں فورسز کی کارروائی کے دوران گھروں میں محصور افراد پر مبینہ تشدد اور ایک شہری چاکر کے گھر کو بلڈوزر سے مسمار کیے جانے کی اطلاعات ہیں۔ ذرائع کے مطابق مسمار کیے گئے مکانات سے پانچ افراد کی لاشیں پھینکے جانے کی اطلاعات ہیں، جن میں شکر اللہ ولد عبدالنبی کی شناخت ہوئی ہے، جبکہ چار لاشوں کی شناخت تاحال نہیں ہوسکی۔

ادھر مشکے کے رہائشی سبزل بلوچ ولد کریم داد کی لاش آواران کے علاقے پیراندر، گزی سے ملنے کی اطلاع ہے۔ ذرائع کے مطابق انہیں گولی مار کر قتل کیا گیا۔ سبزل بلوچ کے بارے میں بتایا جاتا ہے کہ چند ماہ قبل انہیں گھر سے حراست میں لیے جانے کے بعد سے وہ لاپتہ تھے۔

مقامی ذرائع کے مطابق گزشتہ تین روز کے دوران واشک، آواران، پنجگور اور جیونی سمیت بلوچستان کے مختلف علاقوں سے 10 سے زائد لاپتہ افراد کی لاشیں ملنے کی اطلاعات سامنے آئی ہیں۔ ان واقعات کی آزادانہ طور پر مکمل تصدیق نہیں ہوسکی ہے۔