تربت: کرنٹ لگنے سے واپڈا معاون جاں بحق، گومازی سے نوجوان کی گولیوں سے چھلنی لاش برآمد

تربت: کرنٹ لگنے سے واپڈا معاون جاں بحق، گومازی سے نوجوان کی گولیوں سے چھلنی لاش برآمد

تربت کے علاقے شہرک سے تعلق رکھنے والے واپڈا کے امور میں معاونت کرنے والے معروف مقامی کارکن کمال خان ولد دل مراد گزشتہ شب کرنٹ لگنے کے باعث جاں بحق ہوگئے۔

مقامی ذرائع کے مطابق کمال خان شہرک سے سامی تک کے علاقوں میں بجلی کے بلوں اور دیگر متعلقہ امور میں واپڈا کے ساتھ تعاون اور خدمات انجام دیتے تھے، جس کے باعث وہ علاقے میں اچھی شہرت رکھتے تھے۔ ان کی اچانک وفات کی خبر سے علاقے میں افسوس کی لہر دوڑ گئی، جبکہ اہلِ علاقہ اور سماجی حلقوں نے گہرے رنج و غم کا اظہار کیا ہے۔ تاہم واقعے کی وجوہات اور ذمہ داری کے تعین کے حوالے سے تاحال متعلقہ حکام کا مؤقف سامنے نہیں آیا۔

دوسری جانب تمپ کے علاقے گومازی سے ایک نامعلوم نوجوان کی گولیوں سے چھلنی لاش برآمد ہوئی ہے، جس کے بعد علاقے میں تشویش پھیل گئی۔ ذرائع کے مطابق مقامی افراد نے لاش دیکھ کر انتظامیہ کو اطلاع دی، جس پر حکام موقع پر پہنچ گئے اور لاش کو اپنی تحویل میں لے کر قانونی کارروائی کے بعد ہسپتال منتقل کر دیا۔

ابتدائی اطلاعات کے مطابق مقتول کی شناخت تاحال نہیں ہو سکی، جبکہ قتل کے محرکات اور ملزمان کے حوالے سے بھی کوئی معلومات سامنے نہیں آ سکیں۔ حکام نے واقعے کی تحقیقات شروع کر دی ہیں۔