جان محمد کرد کی دوبارہ جبری گمشدگی، انسانی حقوق اور قانون کی سنگین خلاف ورزی، نصراللہ بلوچ کا اظہار تشویش

وائس فار بلوچ مسنگ پرسنز کے چیئرمین نصراللہ بلوچ نے جان محمد کرد کی دوبارہ جبری گمشدگی پر سخت تشویش کا اظہار کیا ہے۔ انہوں نے کہا کہ یہ عمل نہ صرف ماورائے قانون ہے بلکہ آئینِ پاکستان اور انسانی حقوق کی بھی کھلی خلاف ورزی ہے۔

نصراللہ بلوچ کے مطابق، جان محمد کرد ولد عبد الرحیم کے خاندان نے تنظیم سے رابطہ کیا اور انہیں آگاہ کیا کہ 13 اپریل کی رات کوئٹہ کے علاقے کلی لوڑ کاریز، برمہ ہوٹل کے قریب ان کے گھر سے سیکیورٹی فورسز نے اہلخانہ کے سامنے ان کو حراست میں لے کر نامعلوم مقام پر منتقل کر دیا ہے۔ انہوں نے بتایا کہ گرفتاری کی کوئی وجہ نہیں بتائی گئی اور ان کی صحت یا خیریت کے بارے میں بھی کوئی اطلاع فراہم نہیں کی جا رہی ہے۔

انہوں نے کہا کہ اس صورتحال نے خاندان کو شدید ذہنی اذیت، خوف اور غیر یقینی کیفیت میں مبتلا کر دیا ہے۔ اہلخانہ اپنے پیارے کی زندگی کے حوالے سے بہت زیادہ خدشات کا شکار ہیں، کیونکہ جان محمد کرد اس سے پہلے بھی نو سال تک جبری گمشدگی کا شکار رہ چکے ہیں۔ رہائی کے بعد وہ مسلسل بیماری کا شکار رہے ہیں اور صحت کی بحالی کے لیے ان کے خاندان کو بہت مشکلات کا سامنا ہے۔

نصراللہ بلوچ نے زور دے کر کہا کہ کسی بھی شہری کو بغیر قانونی جواز، وارنٹ اور عدالتی عمل کے حراست میں لینا آئین کے آرٹیکل 9 (زندگی اور آزادی کا تحفظ) اور آرٹیکل 10 (منصفانہ ٹرائل کا حق) کی صریح خلاف ورزی ہے۔ یہ عمل قانون سے بالکل متصادم ہے اور اس سے انسانی حقوق کی پامالی ہوتی ہے۔

انہوں نے بلوچستان ہائی کورٹ کے معزز چیف جسٹس سے اپیل کی کہ وہ اس سنگین، ماورائے قانون اقدام کا فوری نوٹس لیں۔ متعلقہ اداروں کو جوابدہ بنائیں اور جان محمد کرد کی باحفاظت بازیابی کے لیے فوری اقدامات کریں۔ انہوں نے کہا کہ عدلیہ پر یہ ذمہ داری عائد ہوتی ہے کہ وہ شہریوں کے بنیادی حقوق کا تحفظ کرے اور ایسے اقدامات کو روکے جو قانون کی حکمرانی کو کمزور کرتے ہیں۔

نصراللہ بلوچ کا کہنا ہے کہ عدلیہ اور ریاستی اداروں کو چاہیے کہ وہ شہریوں کے حقوق کا خیال رکھیں اور قانون کی بالادستی کو یقینی بنائیں۔ ایسی کسی بھی کارروائی کو روکنا ضروری ہے تاکہ انسانی حقوق کا تحفظ ممکن ہو سکے اور عوام کا اعتماد قانون نافذ کرنے والے اداروں میں برقرار رہے۔