مستونگ، سوراب اور خاران: فوجی کارروائیاں، کواڈ کاپٹر حملے، دھماکے اور جبری گمشدگیاں

مستونگ، سوراب اور خاران: فوجی کارروائیاں، کواڈ کاپٹر حملے، دھماکے اور جبری گمشدگیاں

بلوچستان کے مختلف اضلاع مستونگ، سوراب اور خاران سے پاکستانی فورسز کی فوجی کارروائیوں، کواڈ کاپٹر حملوں، دھماکوں اور جبری گمشدگیوں کی اطلاعات موصول ہوئی ہیں۔

ذرائع کے مطابق ضلع مستونگ کے علاقے دشت کمبیلا میں پاکستانی فوج نے ایک رہائشی مکان کو کواڈ کاپٹر کے ذریعے نشانہ بنایا، جس کے نتیجے میں ایک خاتون شدید زخمی ہوگئیں۔

دوسری جانب دشت کے علاقے میں گزشتہ شب نامعلوم افراد نے گیس پائپ لائن کو دھماکا خیز مواد کے ذریعے نشانہ بنایا، جس کے نتیجے میں پائپ لائن کو نقصان پہنچا اور گیس کی فراہمی متاثر ہونے کی اطلاعات ہیں۔ ادھر درخشان پوسٹ کے قریب بوزر گاڑیوں کو بھی بم دھماکوں کے ذریعے نشانہ بنایا گیا، جس کے نتیجے میں تین بوزر گاڑیاں جل کر خاکستر ہوگئیں۔

ادھر ضلع سوراب کے علاقے نغاڑ میں فورسز کی جانب سے بڑے پیمانے پر سرچ آپریشن کیے جانے کی اطلاعات ہیں۔ مقامی ذرائع کے مطابق آپریشن کے دوران مختلف علاقوں میں گھر گھر تلاشی لی گئی جبکہ متعدد داخلی و خارجی راستوں پر نگرانی بھی سخت کردی گئی۔

اسی دوران سوراب سے خلیل احمد ولد نور محمد سمیت دو افراد کو حراست میں لے کر نامعلوم مقام پر منتقل کیے جانے کی اطلاعات موصول ہوئی ہیں۔ اہل خانہ کے مطابق دونوں افراد کی گرفتاری کے بعد سے ان کے بارے میں کوئی اطلاع فراہم نہیں کی گئی۔

دوسری جانب ضلع خاران کے علاقے تازینہ میں آج صبح پاکستانی فوج کی جانب سے فوجی کارروائی کی گئی۔ ذرائع کے مطابق کارروائی کے دوران مارٹر گولے فائر کیے گئے جبکہ کواڈ کاپٹروں کا بھی استعمال کیا گیا۔ مقامی ذرائع کا دعویٰ ہے کہ ایک کواڈ کاپٹر حملے میں تین بکریاں ہلاک ہوئیں، تاہم کسی انسانی جانی نقصان کی اطلاع موصول نہیں ہوئی۔