مستونگ: حفیظ لہڑی کی جبری گمشدگی، لواحقین کی فوری بازیابی کی اپیل

مستونگ: حفیظ لہڑی کی جبری گمشدگی، لواحقین کی فوری بازیابی کی اپیل

مستونگ سے تعلق رکھنے والے نوجوان حفیظ لہڑی کو 20 جون 2025 کو پاکستانی سیکیورٹی فورسز نے جبری طور پر لاپتہ کر دیا ہے۔ ان کے لواحقین کے مطابق، حفیظ لہڑی کو سادہ لباس میں ملبوس اہلکاروں نے ان کے گھر سے حراست میں لیا اور اس کے بعد سے وہ نامعلوم مقام پر ہیں۔

حفیظ لہڑی کے خاندان کی جانب سے جاری کردہ بیان میں کہا گیا ہے کہ "حفیظ لہڑی کو بغیر کسی قانونی جواز کے اٹھا لینا کہاں کا انصاف ہے؟ اگر انہوں نے کوئی جرم کیا ہے تو انہیں عدالت میں پیش کیا جائے اور شفاف ٹرائل کا موقع دیا جائے۔ یہ بنیادی انسانی حقوق کی خلاف ورزی ہے کہ کسی شخص کو یوں جبری طور پر لاپتہ کر دیا جائے اور اس کے اہل خانہ کو اس کے بارے میں کوئی اطلاع نہ دی جائے۔”

لواحقین نے شدید تشویش کا اظہار کرتے ہوئے کہا ہے کہ انہیں حفیظ لہڑی کی سلامتی کے بارے میں شدید خدشات لاحق ہیں۔ انہوں نے انسانی حقوق کی تنظیموں، سول سوسائٹی اور عالمی برادری سے پرزور اپیل کی ہے کہ وہ حفیظ لہڑی کی جبری گمشدگی کا نوٹس لیں اور ان کی فوری اور باحفاظت بازیابی کے لیے اپنی آواز بلند کریں۔

خاندان نے حکومت پاکستان سے مطالبہ کیا ہے کہ وہ اس واقعے کی فوری تحقیقات کرے اور حفیظ لہڑی کو جلد از جلد عدالت میں پیش کیا جائے یا رہا کیا جائے۔ جبری گمشدگیاں نہ صرف متاثرہ افراد بلکہ ان کے اہل خانہ کے لیے بھی شدید ذہنی کرب کا باعث بنتی ہیں اور یہ ایک غیر انسانی عمل ہے۔