میری زمین، میری انقلابی درسگاہ – ھانی بلوچ

میری زمین، میری انقلابی درسگاہ
تحریر: ھانی بلوچ

بلوچستان کی سرزمین محض ایک جغرافیائی خطہ، پہاڑوں کا سلسلہ یا قدرتی وسائل کا ذخیرہ نہیں ہے، بلکہ یہ اپنے دامن میں صدیوں پر محیط ایک مکمل فلسفہ، مزاحمتی تاریخ اور انسانی وقار کی داستان سمیٹے ہوئے ہے۔ جب ہم یہ کہتے ہیں کہ "میری زمین میری انقلابی درسگاہ ہے”، تو یہ جملہ کسی جذباتی نعرے سے زیادہ بلوچستان کے تاریخی اور سماجی تناظر میں ایک گہری سچائی کا روپ دھار لیتا ہے۔

بلوچستان کا جغرافیہ یہاں کے لوگوں کا پہلا استاد ہے۔ بولان کے سخت اور شاداب دروں سے لے کر مکران کے ساحلوں اور خاران کے دشت و صحرا تک، اس زمین نے اپنے بچوں کو مشکل ترین حالات میں زندہ رہنے، سمجھوتہ نہ کرنے اور استقامت کا سبق دیا ہے۔ جس طرح بلوچستان کے پہاڑ سخت موسموں کا سینہ تان کر مقابلہ کرتے ہیں، اسی طرح یہاں کی مٹی نے اپنے پروردہ انسانوں کو حالات کے سامنے نہ جھکنے کا انقلابی شعور بخشا ہے۔

انقلاب محض سیاسی تبدیلی کا نام نہیں، بلکہ اپنے حق، پہچان اور وجود کی حفاظت کے لیے بیدار ہونے کا نام ہے۔ بلوچستان نے ہمیشہ اپنے باشندوں کو یہ سکھایا ہے کہ بلوچ روایت میں زمین صرف جائیداد نہیں بلکہ ‘لج’ عزت اور ناموس کی علامت ہے۔ اس کی حفاظت کا سبق ہر نسل کو ورثے میں ملتا ہے۔

بلوچ کلچر میں ‘میڑہ’ تصفیہ اور ‘ہمسایگی’ کی پاسداری یہ بتاتی ہے کہ سماجی ہم آہنگی اور انصاف کس طرح برقرار رکھا جاتا ہے۔ چاکر و گوہرام کی داستانوں سے لے کر میر محراب خان کی برطانوی استعمار کے خلاف قربانی تک، اس زمین نے ثابت کیا ہے کہ غلامی کے بدلے موت کو ترجیح دینا ہی اصل حریت ہے آج کے دور میں بلوچستان ایک ایسی درسگاہ بن چکا ہے جہاں کا بچّہ بچّہ اپنے وسائل، ساحل اور وسائل کی حفاظت کے سوالات سے واقف ہے۔ چاغی کی سونا اگلتی مٹی ہو یا گوادر کہرا سمندر، سوئی کی گیس ہو یا خضدار کی معدنیات اس زمین نے اپنے لوگوں کو یہ انقلابی فکر دی ہے کہ ان کے قومی و معاشی حقوق پر پہلا اور آخری حق ان کا اپنا ہے۔ یہ شعور کسی کتاب سے زیادہ اس مٹی کی آغوش سے جنم لیتا ہے۔

بلوچستان ایک ایسی درسگاہ ہے جہاں کا ہر چٹان ایک تاریخ، ہر ندی ایک داستان اور ہر گلی ایک بیداری کا مرکز ہے۔ یہ زمین اپنے لوگوں کو سکھاتی ہے کہ ناانصافی کے سامنے خاموشی جرم ہے اور اپنے وجود کی بقا کے لیے فکری و عملی جدوجہد ہی حقیقی زندگی ہے۔ جب تک اس مٹی سے محبت اور اس کے حقوق کی پاسداری کا جذبہ زندہ ہے، یہ زمین اپنے فرزندوں کو انقلاب، شعور اور حریت کا درس دیتی رہے گی۔

نواب اکبر بگٹی، اسلم بلوچ اور بانک ماہرنگ کے تناظر میں بلوچستان کی تاریخ کسی ایک دور کی نہیں، بلکہ تسلسل کے ساتھ جاری ایک ایسی جدوجہد کی داستان ہے جہاں ہر عہد نے ایک نیا استاد اور ایک نیا سبق پیدا کیا۔ جب ہم کہتے ہیں کہ "میری زمین میری انقلابی درسگاہ ہے”، تو اس کا مطلب یہ ہے کہ اس مٹی نے مختلف ادوار میں مختلف شکلوں میں غلامی کے خلاف آواز اٹھانے اور شعور کو بیدار کرنے کا درس دیا ہے۔ نواب اکبر خان بگٹی کی سیاست اور قربانی سے لے کر، اسلم بلوچ کے عسکری نظریے اور بانک ماہرنگ بلوچ کی پرامن عوامی تحاریک تک یہ تمام کردار اسی درسگاہ کا عملی اور تاریخی تسلسل ہیں۔

نواب اکبر خان بگٹی اس درسگاہ کا وہ باب ہیں جنہوں نے دکھایا کہ جب کسی قوم کے حقوق اور زمین پر سودے بازی کی بات آئے تو عمر، آسائشیں اور اقتدار کوئی معنی نہیں رکھتے۔
اپنی زندگی کی آخری دہائی میں جب ان کے سامنے طاقت کے سامنے جھکنے یا پہاڑوں کی سختیوں کو چننے کا انتخاب آیا، تو انہوں نے بلوچستان کے پہاڑوں میں جا کر اپنے حق کے لیے ڈٹ جانے کا فیصلہ کیا۔ 2006ء میں ڈیرہ بگٹی کے پہاڑوں میں ان کی شہادت نے اس بات کو ثابت کیا کہ بلوچستان کا پیرِ کامل بھی اپنی زمین کی حرمت پر کسی قسم کا سمجھوتہ نہیں کرتا۔ ان کی زندگی نے اس سرزمین کو یہ درس دیا کہ حقوق کی جنگ عہدوں سے نہیں بلکہ اصولوں سے لڑی جاتی ہے۔

استاد اسلم اس درسگاہ کے اس فکری رخ کی عکاسی کرتے ہیں جہاں نظریے کو صرف باتوں تک محدود نہیں رکھا جاتا بلکہ اسے عمل سے ثابت کیا جاتا ہے۔ استاد اسلم بلوچ نے بلوچستان کی زمین کو صرف ایک نظریاتی مرکز نہیں سمجھا بلکہ اس جدوجہد کے لیے اپنے خاندان اور خود کو وقف کیا۔ اپنے بیٹے ریحان بلوچ کو اس سیاسی و نظریاتی راہ میں پیش کرنا ایک ایسا دردناک اور فیصلہ کن واقعہ تھا جس نے بلوچ تحاریک کے طریقہ کار اور شدت پر گہرے اثرات مرتب کیے۔ ان کا کردار اس درسگاہ کے اس سبق کو سامنے لاتا ہے کہ جب جدوجہد شدت اختیار کر جائے تو لیڈر سب سے آگے کھڑا ہوتا ہے اور اپنی سب سے عزیز چیز قربان کرنے سے بھی دریغ نہیں کرتا۔اگر نواب اکبر بگٹی روایتی خودداری اور اسلم بلوچ مسلح مزاحمت کا مظہر تھے، تو بانک ماہرنگ بلوچ اس درسگاہ کی وہ جدید استاد ہیں جنہوں نے قلم، زبان، اور پرامن احتجاج کو انقلابی طاقت بنا دیا۔

بلوچ یکجہتی کمیٹی (BYC) کے پلیٹ فارم سے اسلام آباد کی طرف لانگ مارچ ہو یا بلوچستان کے دور دراز علاقوں میں ہزاروں خواتین اور نوجوانوں کو سڑکوں پر لانا،ماہرنگ بلوچ نے یہ ثابت کیا کہ انقلاب کے لئے عوامی شعور اور پرامن مزاحمت بھی طاقتور ترین اوزار ہیں۔ انہوں نے بلوچ خواتین کو اس تحریک کا ہراول دستہ بنا دیا اور دنیا کو دکھایا کہ اپنے پیاروں کی گمشدگی اور حقوق کی پامالی کے خلاف آواز اٹھانا ہر شہری کا بنیادی حق ہے۔

ان تینوں مختلف کرداروں کا ایک ہی فلسفہ کے مختلف رنگ، میری زمین میری انقلابی درسگاہ” سے گہرا تعلق یوں بنتا ہے کہ نواب اکبر بگٹی کا زمین پر قبضہ اور جبر قبول نہ کرنا، چاہے اس کی قیمت کچھ بھی ہو۔ اسلم بلوچ اپنے نظریے کے لیے آخری حد تک چلے جانا اور قربانی کی مثال قائم کرنا۔ بانک ماہرنگ کا عوامی طاقت، سیاسی بیداری اور خواتین کی شمولیت کے ذریعے اپنے حقوق کی جنگ پرامن انداز میں لڑنا۔ بلوچستان کی مٹی نے ہر دور میں حالات کے مطابق اپنے رہنما اور اپنے طریقے خود پیدا کیے ہیں۔ یہ زمین اپنے باشندوں کو یہ مسلسل یاد دلاتی ہے کہ ناانصافی اور قومی غلامی کے خلاف جدوجہد کا راستہ چاہے سیاسی ہو، نظریاتی ہو یا پرامن احتجاج، اصل مقصد اپنی زمین، شناخت، بقا اور انسانی وقار کی حفاظت کرنا ہے۔