کشمیر میں پاکستانی فورسز کا کریک ڈاؤن، ڈاکٹر اور خاتون وکیل سمیت متعدد افراد جاں بحق

کشمیر میں پاکستانی فورسز کا کریک ڈاؤن، ڈاکٹر اور خاتون وکیل سمیت متعدد افراد جاں بحق

پاکستانی زیرِ قبضہ کشمیر کے ضلع کوٹلی میں پاکستانی فورسز اور مظاہرین کے درمیان جھڑپوں کے دوران متعدد افراد کے جاں بحق اور درجنوں کے زخمی ہونے کی اطلاعات موصول ہوئی ہیں۔

مقامی ذرائع کے مطابق پاکستانی فورسز نے مختلف علاقوں میں کارروائیاں کرتے ہوئے گھروں میں بھی چھاپے مارے۔ اطلاعات ہیں کہ ایک مقامی ڈاکٹر اور ایک خاتون وکیل کو ان کے گھروں کے اندر فائرنگ کرکے جاں بحق کردیا گیا۔

دوسری جانب جموں کشمیر جوائنٹ عوامی ایکشن کمیٹی کے لانگ مارچ کے شرکاء پر بھی فائرنگ کی اطلاعات ہیں، جس کے نتیجے میں کئی مظاہرین جاں بحق اور متعدد زخمی ہوئے ہیں۔ زخمیوں کو قریبی ہسپتالوں میں منتقل کیا جا رہا ہے جبکہ مختلف علاقوں سے قافلے مظفرآباد کی جانب پیش قدمی جاری رکھے ہوئے ہیں۔

مظاہرین اور مقامی کارکنان نے الزام عائد کیا ہے کہ ان کی پرامن تحریک کے خلاف طاقت کا استعمال کیا جا رہا ہے، جبکہ حکومتی حلقوں کا کہنا ہے کہ جھڑپوں میں پولیس اہلکار بھی ہلاک ہوئے ہیں۔

علاقے میں انٹرنیٹ اور موبائل فون سروسز کی بندش کے باعث معلومات کی آزادانہ تصدیق ممکن نہیں ہو سکی، جبکہ ہلاکتوں کی تعداد کے حوالے سے متضاد دعوے سامنے آ رہے ہیں۔