اساتذہ کی جبری ریٹائرمنٹ انتقامی کارروائی، غیر جمہوری اور افسوسناک عمل ہے۔بساک

اساتذہ کی جبری ریٹائرمنٹ انتقامی کارروائی، غیر جمہوری اور افسوسناک عمل ہے۔بساک

بلوچ اسٹوڈنٹس ایکشن کمیٹی کے مرکزی ترجمان کی جانب سے جاری کردہ ایک بیان میں کہا گیا ہے کہ بلوچستان میں تعلیمی زبوں حالی کی صورتِ حال عرصہِ دراز سے چلی آ رہی ہے، ہر آنے والی حکومت تعلیمی تبدیلی کے دعوے تو کرتی ہے، لیکن عملی اقدامات سے کوسوں دور نظر آتی ہے۔ جہاں ایک جانب حکومتیں بشمولِ موجودہ حکومت، ہمیشہ تعلیمی بہتری، کوالٹی ایجوکیشن اور شرحِ خواندگی کو بڑھانے کی باتیں کرتی ہیں، وہیں دوسری جانب بلوچستان میں کئی ایسے علاقے ہیں جہاں اساتذہ اور معیاری تعلیم تو دور، اسکول تک موجود نہیں ہیں۔ اس طرح کی صورتِ حال بلوچستان میں جاری تعلیمی پسماندگی کی نشاندہی کرتی ہے، جو کہ لمحہِ فکریہ ہے۔

بیان میں کہا گیا کہ بلوچستان میں سرکاری ملازمین پچھلے ایک سال سے اپنے آئینی حقوق کے لیے احتجاجاً سڑکوں پر دھکے کھا رہے ہیں، جن میں اکثریت پروفیسرز اور اساتذہ کی ہے۔ حکومت جہاں ایک جانب تعلیمی بہتری کے کئی دعوے کر چکی ہے، وہیں دوسری جانب اِن اساتذہ کی جائز مطالبات سننے کے لئے تیار نہیں، اور اب پچھلے کچھ دنوں سے اساتذہ اور دوسرے سرکاری ملازمین کو جبراً ریٹائر کیا جا رہا ہے جو کہ انتہائی افسوس ناک عمل ہے۔ یہ جبری ریٹائرمنٹ کا عمل اُن اساتذہ اور ملازمین کو اپنے حقوق کے لیے آواز بلند کرنے سے دستبردار کرنے کا حربہ ہے جو کہ تشویش ناک ہے۔ ہم سمجھتے ہیں کہ یہ اقدامات بلوچستان کو تعلیم کے حصول سے دور رکھنے اور یہاں کی شرحِ خواندگی کو کم کرنے کی ایک سازش ہے، کیونکہ بلوچستان میں پہلے سے ہی اساتذہ کی شدید کمی ہے جس کی وجہ سے کئی اسکولز بند پڑے ہیں اور وہ حقیقی اسکولوں کے بجائے “گھوسٹ اسکولز” کہلاتے ہیں۔

ترجمان نے کہا کہ اساتذہ کسی بھی معاشرے کی ترقی کا اہم جُز سمجھے جاتے ہیں، اور اساتذہ ہی تعلیمی انقلاب لانے کی بنیادی اکائی ہیں۔ اُن کی اس طرح تذلیل ناقابلِ قبول ہے۔ ہمارا اساتذہ کے ساتھ رشتہ فکری اور روحانی ہے، جو اپنی محنت اور خلوص سے طلبہ کو ایک مقام پر لا کھڑا کرتے ہیں۔ ہمارا بھی یہی ماننا ہے کہ معاشرے کی ترقی، سماجی فلاح و بہبود اور شعوری سفر اساتذہ کے کردار کے بغیر ناممکن ہے۔ اسی بات کو مدنظر رکھتے ہوئے، ہم بطور طلبہ تنظیم اساتذہ کی جبری ریٹائرمنٹ کے عمل کو نہ صرف مسترد کرتے ہیں بلکہ اس کی سخت الفاظ میں مذمت کرتے ہوئے حکومت سے اپیل کرتے ہیں کہ وہ اس تعلیم دشمن پالیسی پر نظرِثانی کر کے اس فیصلے کو جلد از جلد واپس لے۔