بسیمہ، قلات اور خاران میں مسلح حملوں کی اطلاعات

بسیمہ/قلات/خاران: گزشتہ روز بلوچستان کے مختلف علاقوں میں مسلح حملوں اور جھڑپوں کی اطلاعات موصول ہوئی ہیں۔

اطلاعات کے مطابق بسیمہ میں مسلح افراد نے سی پیک کے اہم روٹ کے مختلف حصوں پر کنٹرول حاصل کر لیا اور شاہراہ کے بعض مقامات پر ناکہ بندی کر دی۔ ناکہ بندی کے بعد پاکستانی فورسز اور مسلح افراد کے درمیان شدید فائرنگ اور جھڑپوں کی بھی اطلاعات ہیں۔

دوسری جانب قلات کے علاقوں مہلبی اور گراری میں بیک وقت متعدد مقامات پر حملوں کی اطلاعات موصول ہوئی ہیں۔ ذرائع کے مطابق مسلح افراد نے سیندک پروجیکٹ کی گاڑیوں اور سامان لے جانے والے ایک قافلے کو نشانہ بنایا، جبکہ پاکستانی فوج کی گاڑیوں پر بھی الگ سے حملے کی اطلاع ہے۔

خاران کے علاقے آلبت میں قائم پاکستانی فوج کے ایک مرکزی کیمپ کو بھی شدید مسلح حملے کا نشانہ بنائے جانے کی اطلاعات ہیں۔ ابتدائی معلومات کے مطابق فائرنگ کے بعد کیمپ پر متعدد مارٹر گولے داغے گئے، تاہم نقصانات اور ہلاکتوں سے متعلق کوئی باضابطہ تفصیلات سامنے نہیں آ سکیں۔

اسی دوران خاران شہر میں دو زور دار دھماکوں کی آوازیں سنائی دینے کی بھی اطلاعات ہیں۔ ابتدائی طور پر دھماکوں کی نوعیت اور مقام کے بارے میں معلومات سامنے نہیں آ سکیں۔