بلوچستان میں خواتین سے لے کر شیر خوار بچوں کی جبری گمشدگیاں تشویشناک ہیں۔بلوچ وومن فورم

بلوچستان میں خواتین سے لے کر شیر خوار بچوں کی جبری گمشدگیاں تشویشناک ہیں۔بلوچ وومن فورم

بلوچ وومن فورم کے مرکزی ترجمان نے ایک مذمتی بیان جاری کرتے ہوئے 19 اگست 2026ء کو کوئٹہ کے علاقے گشگوری ٹاؤن سے دو بلوچ خواتین اور دو کمسن بچوں کی جبری گمشدگی کی شدید الفاظ میں مذمت کی ہے۔

بیان کے مطابق گشگوری ٹاؤن میں ایک گھر پر چھاپے کے دوران عمیرہ بلوچ (خاتون) نجمہ بلوچ (خاتون) پریسا (عمر 8 سال) اور ذاکر (عمر محض 1.5 سال / شیر خوار بچہ) کو حراست میں لے کر لاپتہ کر دیا گیا۔

ترجمان کا کہنا تھا کہ ان افراد کو ان کے گھر سے زبردستی اٹھایا گیا ہے اور تب سے انہیں آزادی اور اہل خانہ سے رابطے سے محروم رکھا جا رہا ہے۔

بلوچ وومن فورم کے ترجمان نے زور دے کر کہاکہ خواتین اور معصوم بچوں کے اغوا کا یہ عمل نہ صرف انفرادی حقوق کی پامالی ہے بلکہ قانون کے فراہم کردہ بنیادی تحفظ پر ایک سنگین حملہ بھی ہے۔

انہوں نے کہا کہ ایک 1.5 سالہ شیر خوار بچے کی جبری گمشدگی انتہائی خوفناک اور تشویشناک ہے، جو اس بات کو ظاہر کرتی ہے کہ بلوچستان میں جبری گمشدگیوں کی پالیسی اس حد تک نارملائز کی جا چکی ہے کہ اب خواتین اور شیر خوار بچوں کو بھی نہیں بخشا جا رہا۔

ترجمان کے مطابق بچوں کو کسی بھی شفاف، قانونی اور عدالتی عمل کے بغیر لے جانا ان کے بنیادی انسانی حقوق اور بچوں کو حاصل بین الاقوامی قانونی تحفظات کی سنگین خلاف ورزی ہے۔

بیان میں کہا گیا کہ بغیر وارنٹ اور عدالتی نظام کے زبردستی اٹھا لینے کا یہ سلسلہ اس بات کا ثبوت ہے کہ خطے میں قانون کی حکمرانی کا خاتمہ ہو چکا ہے اور خوف کا ماحول پیدا کیا جا رہا ہے۔

فورم نے مطالبہ کرتے ہوئے کہا کہ عمیرہ بلوچ، نجمہ بلوچ، 8 سالہ پریسا اور 1.5 سالہ شیر خوار ذاکر کی فوری اور باحفاظت بازیابی کو یقینی بنایا جائے اور ان کی موجودگی کے مقام کو عام کیا جائے۔

جبری گمشدگیوں کے اس غیر قانونی سلسلے کو فوراً بند کیا جائے اور تمام لاپتہ افراد کو باقاعدہ عدالتوں میں پیش کیا جائے۔

انسانی حقوق کے بین الاقوامی اداروں اور بچوں کے حقوق کے عالمی میکانزم کو بلوچستان میں خواتین اور معصوم بچوں کی اس جبری گمشدگی کا فوری نوٹس لینا چاہیے اور ان کی بازیابی سمیت ذمہ داران کے محاسبے کے لیے اثر و رسوخ استعمال کرنا چاہیے۔