بلوچستان کے مختلف اضلاع میں بازار اور شاہراہیں بند، کرفیو جیسی صورتحال

بلوچستان کے مختلف اضلاع میں بازار اور شاہراہیں بند، کرفیو جیسی صورتحال

کوئٹہ: بلوچستان کے مختلف اضلاع میں بازار اور تجارتی مراکز بند جبکہ اہم شاہراہوں پر آمدورفت محدود کر دی گئی ہے، جس کے باعث کئی علاقوں میں کرفیو اور لاک ڈاؤن جیسی صورتحال پیدا ہوگئی ہے۔

نوشکی: مرکزی بازار سمیت داخلی و خارجی راستے بند کر دیے گئے ہیں، جبکہ علاقے میں پاکستانی فورسز کی بھاری نفری تعینات ہے۔ مقامی ذرائع کے مطابق صورتحال کے باعث شہری گھروں تک محدود ہو کر رہ گئے ہیں۔

پنجگور: مختلف شاہراہوں، مرکزی بازار اور مارکیٹوں کی بندش کی اطلاعات ہیں۔ مقامی دکانداروں کے مطابق انہیں پاکستانی فورسز کی جانب سے بازار جانے سے روکا گیا، جس کے باعث چتکان بازار سمیت متعدد تجارتی مراکز بند ہیں۔ کاروباری سرگرمیاں بھی معطل ہو کر رہ گئی ہیں۔

کوئٹہ: شہر کی متعدد اہم شاہراہوں پر ٹرکوں اور کنٹینرز کے ذریعے رکاوٹیں کھڑی کر کے آمدورفت محدود کر دی گئی ہے۔ ذرائع کے مطابق اسپنی روڈ، چمن پھاٹک، جوائنٹ روڈ، زرغون روڈ، ریڈ زون سمیت دیگر اہم راستوں پر رکاوٹیں موجود ہیں۔

تربت: علاقے ناصر آباد اور گردونواح میں بھی بازار بند کرائے جانے کی اطلاعات سامنے آئی ہیں، جس کے باعث مقامی کاروباری سرگرمیاں متاثر ہوئی ہیں۔

مقامی ذرائع کے مطابق بلوچستان کے مختلف اضلاع میں موجودہ صورتحال کے باعث معمولاتِ زندگی اور کاروباری سرگرمیاں شدید متاثر ہیں۔