بڑے آپریشن اور بڑے پیمانے پر کریک ڈاؤن کی تیاری کی جا رہی ہے۔  جموں کشمیر جوائنٹ عوامی ایکشن کمیٹی

جموں کشمیر: ہمیں انتہائی باوثوق ذرائع سے یہ خبریں مل رہی ہیں کہ راولاکوٹ میں ایک بہت بڑے آپریشن اور بڑے پیمانے پر کریک ڈاؤن کی تیاری کی جا رہی ہے۔ وزیراعظم کے حالیہ بیان سے بھی یہی تاثر مل رہا ہے کہ حکومت مذاکرات کی طرف جانے کے بجائے سابقہ حکومت کی پالیسی کے تسلسل کو جاری رکھنے کا فیصلہ کر چکی ہے۔ جس انداز میں فورسز کو لانے کی کوششیں کی جا رہی ہیں اور جس طرح حالات کو آگے بڑھایا جا رہا ہے اس سے خدشہ ہے کہ راولاکوٹ اور پونچھ میں بڑے پیمانے پر کارروائی کی جا سکتی ہے۔ جس طرح پہلے ہی تقریباً سو افراد کی جانیں جا چکی ہیں اس صورتحال میں یہ خدشہ مزید سنگین ہو جاتا ہے کہ حکمرانوں کو مزید سو دو سو یا پانچ سو لوگوں کی جانیں جانے سے بھی کوئی فرق نہیں پڑے گا۔ بہرحال دھرنے میں بیٹھے لوگ بھی حالات کی سنگینی کو سمجھ رہے ہیں اور جانتے ہیں کہ آگے کیا ہونے والا ہے۔ پونچھ میں اب تک انٹرنیٹ بحال نہ ہونا بھی انتہائی تشویشناک ہے..ایسا محسوس ہو رہا ہے کہ پونچھ کو ہر طرح سے باقی دنیا سے کاٹ کر تنہا کیا جا رہا ہے تاکہ وہاں ہونے والی کسی بھی کارروائی کی خبر باہر نہ پہنچ سکے۔ یہ وقت خاموش رہنے کا نہیں بلکہ حالات پر گہری نظر رکھنے اور ہر ممکن انسانی جان کے تحفظ کے لیے آواز بلند کرنے کا ہے۔