تربت میں ایف سی کانوائے پر حملہ، ایک اہلکار ہلاک، تین زخمی؛ مستونگ اور ماشکیل میں بھی جھڑپوں کی اطلاعات

تربت: زبیدہ جلال روڈ پر حیر آباد کے مقام پر ایف سی کانوائے کو مسلح افراد نے نشانہ بنایا، جس کے نتیجے میں ایک ایف سی اہلکار ہلاک جبکہ تین زخمی ہوگئے۔

حکام کے مطابق ایف سی کانوائے آج صبح مند کی جانب جا رہا تھا کہ قریبی پہاڑوں سے مسلح افراد نے حملہ کیا۔ فورسز کی جوابی کارروائی کے بعد حملہ آور فرار ہوگئے۔ زخمی اہلکاروں کو طبی امداد کے لیے ایف سی ہیڈکوارٹر منتقل کردیا گیا ہے۔

مستونگ: کھڈ کوچہ کے علاقے گرو کے مقام پر پاکستانی فورسز کے قافلے کو بھی حملے میں نشانہ بنائے جانے کی اطلاعات ہیں۔ علاقے میں گزشتہ کئی ہفتوں سے کشیدگی برقرار ہے۔

ماشکیل: اطلاعات کے مطابق مسلح افراد نے ماشکیل شہر کے بعض اہم مقامات پر کنٹرول حاصل کرلیا ہے۔ ذرائع کے مطابق پولیس تھانے اور کسٹم چیک پوسٹ پر قبضے کے ساتھ ایف سی کے مرکزی کیمپ کو بھی گھیرے میں لیے جانے کی اطلاعات ہیں۔ علاقے میں شدید فائرنگ اور دھماکوں کی آوازیں سنائی دینے کی اطلاعات موصول ہوئی ہیں۔