حالیہ دنوں بلوچ نوجوانوں کی غیر آئینی حراست اور جبری گمشدگیوں میں اضافہ تشویشناک ہے۔بی ایس ایف

حالیہ دنوں بلوچ نوجوانوں کی غیر آئینی حراست اور جبری گمشدگیوں میں اضافہ تشویشناک ہے۔بی ایس ایف

بلوچ اسٹوڈنٹس فرنٹ نے اپنے ایک بیان میں کہا ہے کہ تنظیم، حالیہ دنوں میں بلوچ نوجوانوں کی غیر آئینی حراست اور جبری گمشدگیوں کے تشویشناک حد تک بڑھتے ہوئے واقعات کی سخت الفاظ میں مذمت کرتی ہے، اور اس اقدام کو بنیادی انسانی حقوق اور آئینی حدود کی سنگین خلاف ورزی گردانتی ہے۔

بلوچ اسٹوڈنٹس فرنٹ کے مرکزی ترجمان نے اپنے جاری کردہ بیان میں کہا کہ ریاستی ظلم و بربریت نے چاروں اطراف سے بلوچ قوم کے نوجوانوں، طلبہ اور سیاسی کارکنان پر اپنے پنجے گاڑ دیے ہیں۔ انہیں روز کے معمول کے مطابق طاقت اور اسلحے کے بل بوتے پر غیر آئینی اقدامات اور ظلم و بربریت کی بھینٹ چڑھایا جا رہا ہے۔ کبھی انہیں زندانوں کی تاریکی میں خاموش کر دیا جاتا ہے تو کبھی جنگلوں اور ویرانوں میں ان کی مسخ شدہ لاشیں پھینک دی جاتی ہیں، جو انسانی حقوق کے چارٹر اور عالمی آئین و قوانین کی سنگین خلاف ورزی ہے۔

مرکزی ترجمان نے اپنے بیان میں کراچی یونیورسٹی کے طلبہ کی جبری گمشدگی پر اظہارِ تشویش کرتے ہوئے کہا کہ 4 اگست 2026 کی رات تقریباً 2 بجے، کراچی کے علاقے گلشنِ اقبال کے ایک اپارٹمنٹ پر سیکیورٹی فورسز نے غیر قانونی طور پر چھاپہ مار کر بغیر کسی قانونی وارنٹ اور کارروائی کے پانچ بلوچ طلبہ پر تشدد کرکے انہیں جبری طور پر لاپتہ کر دیا گیا، جو آئین کے آرٹیکل 10 اور 14 کے منافی ہے۔ آئین اس بات کی ضمانت دیتا ہے کہ کسی کو یہ حق حاصل نہیں کہ بغیر کسی قانونی کارروائی اور جرم بتائے، گھر کی چادر و چار دیواری اور فرد کی حرمت کو پامال کرتے ہوئے کسی کو گرفتار کرے یا حبسِ بے جا میں رکھے۔تنظیم نے بتایا کہ لاپتہ ہونے والے طلبہ میں دو سگے بھائی اظہر بلوچ اور غوث بخش بلوچ ولد حیات بلوچ شامل ہیں، جو کراچی یونیورسٹی کے طلبہ اور گوادر کے رہائشی ہیں۔ ان کے ساتھ شہزاد بلوچ ولد شاہد بلوچ گوادر، انیس بلوچ ولد عظیم بلوچ نوشکی اور وسیم بلوچ ولد امین بلوچ قلات بھی شامل ہیں، جو کہ کراچی یونیورسٹی ہی کے طلبہ ہیں۔ انہیں جبری گمشدگی کا نشانہ بناتے وقت جسمانی تشدد کا نشانہ بنایا گیا اور ان کی کتابیں بھی حراست میں لے لی گئیں، جس سے صاف واضح ہے کہ ریاست طلبہ، قلم اور کتاب سے خوفزدہ ہے۔

بیان میں کہا گیا کہ اس کے علاوہ خلیل بلوچ، جو کہ کراچی یونیورسٹی کے ایم فل اسکالر اور آواران مشکے کے رہائشی ہیں، کو 4 اگست 2026 کو جبکہ زبیر بلوچ ولد نور محمد، جو ڈگری کالج حب کے بی ایس کیمسٹری کے فارغ التحصیل طالب علم ہیں، کو 30 جولائی 2026 کو جبری طور پر لاپتہ کیا گیا جو تا حال لاپتہ ہیں۔

آخر میں مرکزی ترجمان نے حکومتِ وقت، ملکی عدلیہ اور متعلقہ اداروں سے مطالبہ کرتے ہوئے کہا کہ تمام بلوچ طلبہ کو آئینی تحفظ فراہم کیا جائے اور انہیں جبری گمشدگی کا نشانہ نہ بنایا جائے۔ اگر ان پر کوئی الزام ہے تو انہیں عدالت کے کٹہرے میں پیش کیا جائے، بصورتِ دیگر ہم اس ظلم و بربریت کے خلاف بھرپور احتجاج کا حق رکھتے ہیں۔