خضدار اور کیچ میں فورسز پر حملوں اور فوجی آپریشن کی اطلاعات

خضدار اور کیچ میں فورسز پر حملوں اور فوجی آپریشن کی اطلاعات

خضدار کے علاقے زیدی میں مختلف واقعات کی اطلاعات سامنے آئی ہیں۔ مقامی ذرائع کے مطابق ایک حملے میں ڈیتھ اسکواڈ سے منسلک اہلکاروں کو نشانہ بنایا گیا، جس میں کم از کم پانچ افراد کی ہلاکت کی اطلاعات ہیں۔

ذرائع کے مطابق زیدی کے علاقے میں پاکستانی فورسز کے دس سے زائد گاڑیوں پر مشتمل ایک قافلے کو بھی الگ واقعے میں نشانہ بنایا گیا، جس کے نتیجے میں دو گاڑیوں کو نقصان پہنچنے اور جانی نقصانات کی اطلاعات ہیں۔

دوسری جانب کیچ کے علاقوں گیبن اور کلاتک میں پاکستانی فورسز کی زمینی اور فضائی آپریشن کی اطلاعات موصول ہوئی ہیں۔ مقامی ذرائع کا دعویٰ ہے کہ صبح سے علاقے میں شدید دھماکوں کی آوازیں سنی جا رہی ہیں۔

ذرائع کے مطابق گزشتہ رات سے بڑی تعداد میں پاکستانی فوجی اہلکار علاقے کی جانب پیش قدمی کر رہے ہیں، جبکہ فورسز کے لیے خوراک، پانی اور دیگر ضروری سامان گاڑیوں کے ذریعے پہنچایا جا رہا ہے۔

جبکہ سرکاری حکام کی جانب سے تاحال کوئی باضابطہ بیان سامنے نہیں آیا۔