خضدار: میں خاتون سے زیادتی، متاثرہ کا انصاف نہ ملنے پر خودکشی کی دھمکی

خضدار: میں خاتون سے زیادتی، متاثرہ کا انصاف نہ ملنے پر خودکشی کی دھمکی.

خضدار کے نواحی علاقے کوشک کی رہائشی صغریٰ بی بی نے خضدار پریس کلب میں پریس کانفرنس کرتے ہوئے الزام عائد کیا ہے کہ انہیں ایک بااثر شخص اسامہ خدرانی ولد حاجی عمر نے اغوا کے بعد تشدد اور جنسی زیادتی کا نشانہ بنایا۔ متاثرہ خاتون نے کہا کہ اگر انہیں انصاف فراہم نہ کیا گیا تو وہ اپنی زندگی ختم کرلیں گی۔

پریس کانفرنس کے دوران صغریٰ بی بی کی والدہ قرآن پاک ہاتھ میں لیے اپنی بیٹی کے ساتھ موجود تھیں جبکہ دیگر اہل خانہ اور رشتہ دار بھی شریک ہوئے۔ متاثرہ خاتون کا کہنا تھا کہ وہ اپنی بہن کے ساتھ درزی کے پاس جا رہی تھیں کہ ملزم نے ایک گاڑی میں زبردستی اغوا کر لیا، نشہ آور اشیاء پلانے کے بعد زیادتی کی اور چند گھنٹوں بعد چھوڑ دیا گیا۔

صغریٰ بی بی نے کہا کہ وہ یتیم ہیں اور اس ظلم نے ان کی زندگی کو تاریک کر دیا ہے۔ ان کے مطابق یہ معاملہ صرف ذاتی نہیں بلکہ بلوچ سماج کی غیرت کا سوال ہے۔

متاثرہ خاتون کی والدہ نے کہا کہ ہم غریب اور بے سہارا لوگ ہیں، صرف اللہ پر بھروسہ ہے، لیکن حکومت اور ادارے اگر انصاف نہ دیں تو یہ ظلم بڑھتا جائے گا۔

اہل خانہ نے الزام عائد کیا کہ ملزم کا تعلق ایک سرکاری حمایت یافتہ ڈیتھ اسکواڈ سے ہے، جس کے باعث اسے قانونی کارروائی سے بچانے کی کوشش کی جا رہی ہے۔

مقامی پولیس حکام کے مطابق واقعے کی ایف آئی آر درج کرلی گئی ہے اور تحقیقات جاری ہیں، تاہم ابھی تک ملزم کی گرفتاری عمل میں نہیں آسکی۔

یاد رہے کہ خضدار اور بلوچستان کے دیگر علاقوں میں اس سے قبل بھی ڈیتھ اسکواڈز پر خواتین کے اغوا، تشدد اور جبری شادی جیسے سنگین الزامات سامنے آچکے ہیں۔ سیاسی و سماجی حلقے حکومت سے بارہا ان گروہوں کے خلاف کارروائی کا مطالبہ کرچکے ہیں، لیکن اب تک کوئی خاطر خواہ اقدام نہیں ہوسکا۔