زہری پاکستانی فوج کے ڈرون حملے میں خواتین سمیت چار افراد جانبحق

زہری پاکستانی فوج کے ڈرون حملے میں خواتین سمیت چار افراد جانبحق

خضدار: زہری پاکستانی فوج کی جانب سے تراسانی کازوے کے قریب کیے گئے ڈرون حملے میں ایک ہی خاندان کے دو خواتین اور ایک مرد سمیت چار افراد جانبحق جبکہ پانچ زخمی ہوگئے۔

عینی شاہدین کے مطابق ڈرون حملہ ایک مجمع کے قریب کیا گیا جس میں علی اکبر میراجی، ان کی اہلیہ اور دو دیگر رشتہ دار جانبحق ہوئے۔ جانبحق ہونے والوں میں ایک راہگیر بھی شامل ہے، زخمیوں میں خواتین اور مرد دونوں شامل ہیں۔

ذرائع کے مطابق جانبحق ہونے والے مولوی علی اکبر میراجی اپنے خاندان کے ہمراہ سوراب گدر تعزیت کے لیے گئے تھے اور واپسی پر اپنے گھر فراخود چھاب جا رہے تھے جب ان کا قافلہ ڈرون حملے کا نشانہ بنا۔

مقامی آبادی کا کہنا ہے کہ علاقے میں ڈرونز کی پروازیں مسلسل جاری ہیں جس سے خوف و ہراس کی فضا قائم ہے۔

پاکستانی فورسز کی جانب سے آج کے ڈرون حملے پر کوئی باضابطہ بیان جاری نہیں کیا گیا ہے، تاہم دو روز قبل آئی ایس پی آر نے زہری میں جیٹ طیاروں کی بمباری کی تصدیق کی تھی۔

اس بمباری میں فوجی ترجمان کے مطابق بلوچ آزادی پسندوں کے خفیہ ٹھکانے کو نشانہ بنایا گیا تھا، مگر مقامی ذرائع کا کہنا ہے کہ عام آبادی متاثر ہوئی تھی جس میں پندرانی قبیلے کے تین افراد مارے گئے۔

زہری اور گردونواح میں پاکستانی فوج کی جانب سے فضائی کارروائیوں کا یہ حالیہ ہفتے میں دوسرا واقعہ ہے اگست سے اب تک علاقے میں تین سے زائد فضائی حملے ہو چکے ہیں جن میں دو ڈرون حملے شامل ہیں۔