زہری کرفیو ہمیں اپنے جانبحق ساتھیوں کی تعزیت سے روکا جارہا ہے۔ سردار اختر مینگل

زہری کرفیو ہمیں اپنے جانبحق ساتھیوں کی تعزیت سے روکا جارہا ہے۔ سردار اختر مینگل

‏بلوچستان نیشنل پارٹی کے قائد سردار اختر مینگل نے بیان میں کہا ہے آج صبح 8 بجے سے مجھے اور پارٹی کی مرکزی قیادت کے اراکین کو زہری جانے سے روکا جا رہا ہے، جہاں ہم سردار نصیر احمد موسانی کے صاحبزادے کے انتقال پر تعزیت کے لیے جانا چاہتے تھے۔

‏انہوں نے کہا اس سے بھی زیادہ افسوسناک بات یہ ہے کہ سردار موسیانی کے وہ بیٹے جو حراست میں ہیں، انہیں اپنے ہی بھائی کے جنازے میں شرکت کی اجازت نہیں دی گئی، پارٹی کارکنوں، ہمدردوں اور دوستوں کو بھی سوگوار خاندان کے ساتھ اظہارِ تعزیت اور یکجہتی سے روکا گیا۔

‏سردار اختر نے کہا غم میں شریک ہونا، جنازے میں شرکت کرنا اور تعزیت کرنا نہ صرف ایک بنیادی انسانی حق ہے بلکہ ہماری معاشرتی اور روایتی اقدار کا بھی حصہ ہے، ایسے حالات کا سامنا ہمیں جنرل مشرف کے دور میں بھی نہیں کرنا پڑا تھا۔

انہوں نے مزید کہا یہ انتہائی تشویشناک امر ہے کہ جمہوریت کے دعوے کرنے والے نظام میں لوگوں کو اپنے پیاروں کے غم میں شریک ہونے کے بنیادی حق سے بھی محروم کیا جا رہا ہے۔