سوراب میں 11  اگست کو بلوچوں پرجیٹ طیاروں سے جو بمباری سفاکیت، سراسر ظلم اور بربریت ہے۔ الطاف حسین

سوراب میں 11  اگست کو بلوچوں پرجیٹ طیاروں سے جو بمباری سفاکیت، سراسر ظلم اور بربریت ہے۔ الطاف حسین

الطاف حسین بانی متحدہ قومی موومنٹ نے اپنے ایک بیان میں کہا ہے کہ بلوچستان کے علاقے سوراب میں 11  اگست کو بلوچوں پرجیٹ طیاروں سے جوبمباری کی گئی ہے اس کی جتنی بھی مذمت کی جائے کم ہے، یہ سفاکیت ہے، سراسر ظلم ہے، بربریت ہے، یہ بمباری فرعونیت ہے، ہامانیت ہے، شدادیت ہے، خداظلم کرنے والوں کی رسی کھینچے اورمظلوم بلوچوں کے ساتھ انصاف کرے۔  جیٹ طیاروں سے بمباری کرکے 30 سے زائد معصوم بچوں، خواتین اوربزرگوں کو شہید کردیاگیا لیکن قوم سے جھوٹ بولاجارہا ہے کہ دہشت گرد بم بنارہے تھے اس دوران دھماکہ ہوگیا۔ یہی عمل آپ نے افغانستان میں منشیات کے عادی افراد کے علاج کیلئے قائم اسپتال پر فضائی حملہ کرکے کیاتھا اور کہتے رہے کہ ہم نے دہشت گردوں کے ٹھکانے اور اسلحہ کی فیکٹری پر حملہ کیاہے لیکن ایمنسٹی انٹرنیشنل نے چھ ماہ کی تحقیقات کرکے آپ کے بیانئے کو غلط قراردیدیا۔

بیان میں کہا کہ  ایک طرف یہ کہاجارہاہے کہ عسکریت پسند بم بنارہے تھے، آپریشن ہوااوردہشت گردمارے گئے، میں سوال کرتاہوں کہ کیاآپ کے پاس اطلاع تھی کہ دھماکہ ہونے والا ہے؟ آخر اس کہانی سے کس کس کوبیوقوف بنایاجائے گا، جبکہ علاقے کے لوگ کہتے ہیں کہ وہاں گھروں پر متعدد دھماکے ہوئے اس کاواضح مطلب ہے کہ وہاں بمباری ہوئی،

پاکستان کے حکمراں اورعسکری ادارے ہوش کے ناخن لیں،اس وقت بلوچستان، کشمیراور خیبرپختونخوا میں بے گناہ لوگوں کو ماراجارہا ہے، KPK میں ڈرون حملوں میں معصوم بچے مارے جارہے ہیں، ملک کا ہرشہری غمزدہ اورماتم کناں ہے، بلوچستان میں فضائی حملوں میں بے گناہ انسان مارے جارہے ہیں، خدارا یہ ظلم بند کرواور یادرکھو کہ جتنا ظلم کروگے اتنی ہی شدت سے نفرت کی آگ بھڑکے گی اورظلم کے خلاف مزاحمت ہوگی۔

الطاف حسین نے کہا کہ میں اہلِ پنجاب سے یہ کہوں گاکہ خداراا بلوچوں کو ملک دشمن کہہ کرانہیں مارنے کی باتیں نہ کریں، یہ تاریخی حقائق ہیں کہ بلوچستان پاکستان کاحصہ نہیں تھا اوربلوچستان پر فوج کشی کرکے قبضہ کیاگیا تھا اوربلوچ عوام اس ناجائز قبضے کے خلاف مزاحمت کررہے ہیں۔ پاکستان خصوصاً پنجاب کے عوام بلوچستان، کشمیراور خیبرپختونخوا میں ہونے والے مظالم کے خلاف آوازاٹھائیں۔

یہ انتہائی افسوسناک ہے کہ جشن آزادی کے موقع پرایک طرف پاکستان کے عوام کولاشوں کے تحفے دیئے جارہے ہیں اوردوسری طرف رقص وسرور کی محافل سجائی جارہی ہیں، بلوچوں کی لاشوں پر جشن منانے کا عمل انتہائی افسوسناک ہے۔

ٹیلی ویژن بند رکھنے کی اپیل:

پاکستان کے عوام سے دردمندانہ اپیل کروں گا کہ اپنے ہم وطن مظلوموں سے اظہاریکجہتی اور معصوم لوگوں کی شہادتوں کے سوگ میں احتجاجاً کچھ گھنٹوں کیلئے اپنے اپنے گھروں میں ٹیلی ویژن اس طرح بند رکھیں، کراچی سے خیبر، بلوچستان کی وادیوں سے کشمیر، ہزاروال اورگلگت  بلتستان تک ٹیلی ویژن بند رکھیں یا پروگرام بناکر پورے پاکستان میں شام 7 بجے سے 9 بجے تک اپنے اپنے گھروں کی لائٹس بند کرکے بلیک آؤٹ کریں اوراپنا پرامن احتجاج ریکارڈ کرائیں۔ مظلوم بلوچوں، پختونوں، کشمیریوں اوردیگر مظلوموں کو اپنا ہم وطن سمجھیں اورسوچیں کہ خدانخواستہ اگر کسی کے گھرمیں کوئی وفات پاجائے تو کیا وہ ٹیلی ویژن پر ڈرامے دیکھے گا؟

حقوق کی آواز بلند کرنے پر تحریک انصاف کے بانی عمران خان اوران کی جماعت کو غدار اورملک دشمن قراردیا جارہاہے،ملک بھرکے عوام عمران خان کیلئے بھی آوازاٹھائیں۔ پرامن احتجاج کے حوالے سے تحریک انصاف یا کوئی بھی جماعت پروگرام دے گی تو ایم کیوایم ان کاغیرمشروط ساتھ دے گی۔

بیان میں کہا کہ میں پاکستان عسکری اداروں سے اپیل اورمطالبہ کرتاہوں کہ پاکستان کے مظلوم عوام پر ظلم وستم کاسلسلہ بند کیاجائے، یہ عمل ملک کے مستقبل کیلئے تباہ کن ثابت ہوگا۔ یہ 40 یا60 کی دہائی کازمانہ نہیں ہے کہ ملک کے کسی بھی حصے میں ظلم وستم کے سلسلے کوچھپایاجاسکے، یہ سوشل میڈیا کازمانہ ہے اورسوشل میڈیا ہر جھوٹے بیانیے کاتوڑکردیتا ہے۔

الطاف حسین نے کہا کہ میں دعاکرتاہوں کہ خدااس بمباری میں شہیدہونے والے معصوم بچے،بچیوں، عورتوں اورمردوں کواپنی جواررحمت میں جگہ دے اوران کے لواحقین کوصبرجمیل عطافرمائے۔