سوراب گدر میں بمباری کے باعث زخمی مزید ایک خاتون، بی بی سارہ زوجہ بصیراحمد جان کی بازی ہار گئی۔ بی وائی سی

بلوچ یکجہتی کمیٹی نے اپنے ایک بیان میں کہا ہے کہ گزشتہ ماہ سوراب کے علاقے گدر میں پاکستانی فورسز کی جانب سے عام آبادی پر بمباری کے نتیجے میں کئی مقامی باشندے شہید اور زخمی ہوئے تھے۔ زخمی ہونے والوں میں شامل ایک اور خاتون، بی بی سارہ زوجہ بصیراحمد بھی آج زخموں کی تاب نہ لاتے ہوئے جان کی بازی ہار گئی۔

انہوں نے کہا کہ بلوچستان میں جاری بلوچ نسل کشی کا سلسلہ پاکستانی ریاست کی جانب سے مزید شدت کے ساتھ جاری ہے۔ اس پالیسی میں پاکستانی فوج کے ساتھ دیگر عسکری اداروں کے علاوہ سول ادارے بھی شامل ہیں، جن میں مقامی انتظامیہ اور عدالتی ادارے بھی شامل ہیں۔

بی وائی سی نے کہا کہ سوراب میں بمباری کے واقعے کے بعد احتجاج ختم کروانے کے لیے حکومت کی جانب سے یہ وعدہ کیا گیا تھا کہ زخمی افراد کا علاج پاکستان کے بہتر ہسپتالوں میں کروایا جائے گا۔ تاہم، زخمیوں کو بہتر طبی سہولیات فراہم کرنے کے بجائے ان کا علاج سوراب اور خضدار میں ان کے خاندانوں نے اپنی مدد آپ کے تحت کیا۔ مناسب طبی سہولیات نہ ملنے کے باعث آج ایک اور خاتون جان کی بازی ہار گئی۔

بلوچ یکجہتی کمیٹی بلوچ عوام اور ان تمام اداروں میں موجود بلوچ قوم کے افراد سے اپیل کرتی ہے کہ خدارا چند مراعات یا ذاتی مفادات کی خاطر اپنی قوم کی زندگیوں سے کھیلنے کے اس عمل کا حصہ نہ بنیں۔ اپنی ہی قوم کے خون سے اپنے ہاتھ رنگنے کے بجائے اپنی قومی ذمہ داریوں کا احساس کریں اور بلوچستان میں جاری ان نسل کش پالیسوں کے خلاف اپنی آواز بلند کریں۔