لندن میں الطاف حسین کی رہائش گاہ پر مبینہ حملہ، ایم کیو ایم رابطہ کمیٹی کا تحقیقات کا مطالبہ

لندن (خصوصی رپورٹ): متحدہ قومی موومنٹ (ایم کیو ایم) کے بانی الطاف حسین کی شمالی لندن کے علاقے ایج ویئر کے قریب مل ہل (Mill Hill) میں واقع رہائش گاہ پر دو نقاب پوش افراد نے مبینہ طور پر حملے کی کوشش کی ہے۔
ایم کیو ایم کی رابطہ کمیٹی کے مطابق بظاہر تربیت یافتہ نظر آنے والے ان گھس بیٹھیوں نے گھر کا مرکزی گیٹ پھلانگ کر گھر کے اندر داخل ہونے کی کوشش کی اور اس دوران بیرونی دروازے اور کھڑکیوں کو شدید نقصان پہنچایا۔ ایم کیو ایم کی رابطہ کمیٹی نے برطانوی حکام سے واقعے کی مکمل تحقیقات اور ملوث افراد کی فوری شناخت کا مطالبہ کیا ہے۔
ایم کیو ایم کے بانی الطاف حسین نے صورتحال کا احوال بیان کرتے ہوئے بتایا کہ وہ اس حملے کے وقت گھر میں موجود تھے۔ دو نقاب پوش افراد نے گھر کا سامنے والا گیٹ پھلانگا اور اندر داخل ہونے کی کوشش کی۔ کھڑکی کا شیشہ توڑا جس سے سیکورٹی الارم بجنے لگے تو حملہ آوار بھاگنے پر مجبور ہوئے۔ واقعہ کی سی سی ٹی وی میں دیکھا جاسکتا ہے کہ حملہ آوار ایک کار میں آئے تھے اور انکے مزید ساتھی کار میں موجود رہے۔ ایم کیو ایم کے رہنماؤں نے اسکاٹ لینڈ یارڈ سمیت برطانیہ کے پولیس سے الطاف حسین پر حملہ کی تحقیقات کا مطالبہ کیا ہے

یاد رہے سترہ ستمبر کو ایم کیو ایم کے بانی رہنماء الطاف حسین کا تہتر ویں سالگرہ دنیا بھر میں منایا جارہا تھا